Një projekt i ri kërkimor në Britani synon të përdorë inteligjencën artificiale për të përmirësuar zbulimin, parandalimin dhe trajtimin e demencës, përmes krijimit të një rrjeti prej 10 klinikash të specializuara në të gjithë vendin.
Projekti, i quajtur BRAINIAC Hub, do të drejtohet nga Universiteti i Exeterit dhe do të financohet me 10 milionë paund nga Këshilli për Kërkime në Inxhinieri dhe Shkenca Fizike (EPSRC), pjesë e organizatës shtetërore UK Research and Innovation. Një tjetër fond prej 10 milionë paundësh do të sigurohet nga partnerë të industrisë, organizata bamirëse dhe Shërbimi Kombëtar Shëndetësor britanik (NHS).
Projekti gjashtëvjeçar do të bashkojë 11 universitete dhe 10 qendra shëndetësore të NHS-së. Klinikat e para pritet të nisin funksionimin në vitin 2029, fillimisht duke pranuar pacientë përmes referimit nga sistemi shëndetësor.
Nëpërmjet inteligjencës artificiale, studiuesit synojnë të kombinojnë të dhënat nga skanimet e trurit, analizat gjenetike, biomarkerët në gjak dhe testet dixhitale të aftësive njohëse, për të krijuar një panoramë më të plotë të shëndetit të trurit të çdo individi.
Sipas drejtuesve të projektit, një nga objektivat kryesore është identifikimi i shenjave të para të demencës përpara shfaqjes së simptomave, duke u mundësuar njerëzve të përfitojnë nga plane të personalizuara për parandalimin dhe reduktimin e rrezikut.
Drejtori i BRAINIAC, profesori David Llewellyn, tha se zbulimi i hershëm mbetet sfida më e madhe në luftën kundër demencës. Ai theksoi se teknologjitë e reja mund të ndihmojnë në identifikimin e ndryshimeve të para në tru dhe në ofrimin e këshillave të personalizuara për ruajtjen e shëndetit mendor.
Projekti synon të përshpejtojë procesin e vlerësimit dhe diagnostikimit me 30 deri në 50 për qind, si dhe të identifikojë më shumë se 40 për qind të personave që vlerësohen si të rrezikuar në fazat e hershme, përpara shfaqjes së simptomave.
Sipas të dhënave të Universitetit të Exeterit, rreth 982 mijë persona jetojnë aktualisht me demencë në Britani, ndërsa kjo shifër parashikohet të arrijë në 1.4 milionë deri në vitin 2040. Kostoja vjetore e sëmundjes pritet të kalojë 90 miliardë paund.
Në projekt janë përfshirë edhe universitete të njohura si Cambridge, Oxford, Newcastle, Swansea dhe Imperial College London, si dhe organizata të specializuara në mbështetjen e personave me demencë, përfshirë Dementia UK dhe Alzheimer’s Society.
BRAINIAC është një nga pesë qendrat e reja kërkimore që do të financohen në Britani, në kuadër të një programi që synon përdorimin e teknologjive të avancuara për përmirësimin e kujdesit shëndetësor dhe parandalimin e sëmundjeve. /skyweb.al
