Shkencëtarët në Universitetin e Kembrixhit kanë zhvilluar një vaksinë të re kundër gripit të shpendëve, duke përdorur inteligjencën artificiale për të krijuar mbrojtje ndaj disa varianteve të virusit me vetëm një dozë.
Ndryshe nga vaksinat tradicionale, të cilat synojnë një variant të caktuar të virusit, vaksina e re është projektuar për të ofruar mbrojtje më të gjerë, përfshirë edhe ndaj varianteve që mund të shfaqen në të ardhmen.
Zbulimi është pjesë e një gjenerate të re vaksinash, të cilat synojnë të parandalojnë përhapjen e disa varianteve të të njëjtit virus dhe të përgatisin sistemet shëndetësore për emergjenca të mundshme globale.
“ Në vend që të sigurojë imunitet ndaj një varianti të vetëm të gripit të shpendëve, vaksina jonë me spektër të gjerë ofron mbrojtje ndaj një numri shumë të madh variantesh”, u shpreh Jonathan Heeney, nga Laboratori i Zoonozave Virale në Universitetin e Kembrixhit, i cili drejtoi studimin.
Sipas tij, vaksina është projektuar për të parashikuar evolucionin e virusit, në vend që të reagojë vetëm pasi shfaqen variante të reja.
Studimi, i publikuar në revistën shkencore “Cell Reports Medicine”, tregoi se vaksina e re ofron mbrojtje më të gjerë dhe rezultate më të mira në mbijetesë, krahasuar me vaksinat kandidate standarde që synojnë vetëm një variant të virusit.
Gripi i shpendëve, ashtu si koronaviruset që shkaktuan pandeminë COVID-19, bën pjesë në grupin e viruseve ARN. Këta viruse përbëjnë një shqetësim për shëndetin publik, pasi mund të pësojnë ndryshime gjenetike relativisht shpejt, duke krijuar variante të reja që mund të kalojnë nga kafshët te njerëzit dhe t’i shmangen pjesërisht mbrojtjes së sistemit imunitar.
Deri më tani, strategjia për përgatitjen ndaj pandemive është mbështetur kryesisht në grumbullimin e vaksinave që synojnë variante të njohura të virusit. Teknologjia e re synon ta ndryshojë këtë qasje, duke krijuar vaksina që mund të ofrojnë mbrojtje edhe përballë varianteve që ende nuk janë shfaqur.
“Ne mund të jemi të përgatitur për t’iu përgjigjur menjëherë epidemive dhe pandemive virale, në vend të situatës aktuale, kur gjithmonë jemi në pozita reaguese dhe përpiqemi të përgjigjemi me një vaksinë të krijuar për një variant që ndërkohë mund të ketë ndryshuar”, theksoi Heeney.
Sipas autorëve të studimit, zhvillimi i vaksinave me spektër të gjerë mund të përbëjë një hap të rëndësishëm për sigurinë shëndetësore, duke ndihmuar vendet të përgatiten më mirë për kërcënimet e ardhshme pandemike. /skyweb.al
