Komisioni Europian ka arritur në përfundimin paraprak se TikTok mund të ketë shkelur Aktin për Shërbimet Digjitale (DSA), duke krijuar kushte që nxisin përdorimin e tepruar të platformës dhe rrezikojnë shëndetin fizik e mendor të përdoruesve, veçanërisht të fëmijëve dhe adoleshentëve.
Sipas vlerësimit të Komisionit, disa prej veçorive kryesore të aplikacionit janë projektuar në mënyrë të tillë që t’i mbajnë përdoruesit sa më gjatë të angazhuar. Mes tyre përmenden videot që shfaqen pa ndërprerje, luajtja automatike, njoftimet e shpeshta dhe algoritmi i rekomandimeve të personalizuara.
Autoritetet evropiane paralajmërojnë se këto mekanizma mund të nxisin sjellje kompulsive, duke bërë që përdoruesit të vazhdojnë të konsumojnë përmbajtje pa qenë të vetëdijshëm për kohën që kalojnë në platformë.
Hetimi paraprak ngre shqetësime se TikTok nuk ka vlerësuar në mënyrë të mjaftueshme ndikimin e këtyre funksioneve, sidomos tek të miturit dhe grupet më të cenueshme. Komisioni thekson se kompania nuk ka marrë parasysh tregues të rëndësishëm të përdorimit problematik, si aktiviteti i fëmijëve në orët e vona të natës dhe numri i herëve që ata hapin aplikacionin gjatë ditës.Kritika ka edhe për mekanizmat e vendosur për kufizimin e kohës para ekranit. Sipas Komisionit, njoftimet për kohën e kaluar në aplikacion mund të shpërfillen lehtësisht, ndërsa aktivizimi i kontrolleve prindërore kërkon njohuri teknike dhe angazhim nga prindërit.
Për të adresuar këto shqetësime, Komisioni Europian kërkon ndryshime në mënyrën e funksionimit të platformës. Masat e propozuara përfshijnë kufizimin e funksioneve që nxisin përdorimin e vazhdueshëm, vendosjen e pushimeve më efektive nga ekrani, veçanërisht gjatë natës, si dhe ndryshimin e sistemit të rekomandimit të videove.
Nga ana tjetër, TikTok ka hedhur poshtë përfundimet paraprake të Komisionit Evropian, duke i cilësuar ato si të pasakta dhe pa baza. Një përfaqësues i kompanisë ka deklaruar se platforma do të përdorë të gjitha mjetet e nevojshme për të kundërshtuar pretendimet e autoriteteve evropiane.
Në bazë të Aktit për Shërbimet Digjitale, TikTok ka të drejtë të shqyrtojë dosjen e hetimit dhe të paraqesë me shkrim kundërshtimet dhe argumentet e tij përpara se të merret një vendim përfundimtar.
Nëse shkeljet konfirmohen, kompania rrezikon një gjobë deri në 6 për qind të xhiros vjetore globale.
Komisioni Europian rithekson se platformat e mëdha digjitale kanë detyrimin të identifikojnë dhe të parandalojnë rreziqet që mund të shkaktojnë shërbimet e tyre, duke vendosur në plan të parë mbrojtjen e përdoruesve dhe veçanërisht të fëmijëve dhe adoleshentëve./skyweb.al
