Ndryshimet në shikim janë një pjesë e natyrshme e procesit të plakjes, por për shumë persona që kanë kaluar të 40-at, pranimi i nevojës për syze po rezulton më i vështirë nga sa pritej.
Një problem që shfaqet gradualisht është vështirësia për të lexuar nga afër, për të parë qartë shkronjat e vogla apo për të përdorur telefonin pa i larguar sytë nga ekrani. Megjithatë, shumë persona nuk e kuptojnë menjëherë se shikimi i tyre ka ndryshuar.
Ky ishte edhe rasti i Erika Garcia-Niles, 49 vjeçe, e cila po kërkonte syze dielli në një dyqan T.J. Maxx, kur provoi një palë syze dhe u befasua nga qartësia me të cilën shihte. Fillimisht mendoi se bëhej fjalë për cilësinë e veçantë të lenteve dhe pyeti veten nëse ishin të polarizuara.
Por kur i hoqi syzet, kuptoi se ato kishin një korrigjim optik prej 2.0 dioptrish. Deri në atë moment, ajo nuk e kishte kuptuar se kishte nevojë për syze leximi, shkruan Wall Street Journal.
Rënia graduale e shikimit nga afër lidhet shpesh me presbiopinë, një ndryshim i zakonshëm që shfaqet me kalimin e moshës. Ajo ndodh për shkak të humbjes së elasticitetit të thjerrëzës së syrit, duke e bërë më të vështirë fokusimin te objektet që ndodhen pranë.
Edhe pse është një proces fiziologjik që prek shumicën e njerëzve, përballja me të mund të jetë e vështirë, veçanërisht për ata që nuk janë mësuar ta lidhin veten me shenjat e plakjes.
Nevoja për të mbajtur syze leximi shpesh shihet si një tjetër tregues i kalimit të viteve. Për këtë arsye, disa persona priren t’i shtyjnë vizitat te okulisti ose të mos e pranojnë menjëherë se shikimi i tyre nuk është më si më parë.
