Banka franceze “Crédit Mutuel Arkéa” është përballur me një sulm të sofistikuar kibernetik, si pasojë e të cilit janë transferuar në mënyrë të paligjshme rreth 100 milionë euro drejt institucioneve të tjera financiare.
Sipas njoftimit të bankës, autorët e sulmit arritën të depërtonin në sistemet e saj dhe të kryenin një sërë transfertash me vlera të konsiderueshme. Megjithatë, institucioni siguron se ndërhyrja nuk ka prekur llogaritë e klientëve dhe as kursimet e tyre.
Pas transferimit, paratë janë konvertuar në kriptomonedha përmes platformave të specializuara të këmbimit. Banka bëri të ditur se një pjesë e shumës është arritur të bllokohet, ndërsa vijojnë përpjekjet për të rikuperuar pjesën tjetër të fondeve.
Drejtuesit e “Crédit Mutuel Arkéa” kanë përjashtuar mundësinë e një gabimi njerëzor, duke argumentuar se bëhet fjalë për një sulm të organizuar nga jashtë. Për momentin, nuk janë bërë publike detaje mbi mënyrën e ndërhyrjes apo identitetin e autorëve.
Prokuroria e Parisit ka hapur një hetim zyrtar, duke e klasifikuar ngjarjen si sulm ndaj një sistemi të automatizuar të përpunimit të të dhënave, të kryer nga një grup i organizuar.
Rastin e bëri fillimisht publik hetuesi i pavarur i blockchain-it, ZachXBT, i cili gjurmoi lëvizjet e fondeve në rrjetet e kriptomonedhave. Sipas tij, paratë ishin shpërndarë në disa llogari të krijuara në platformat e këmbimit të aseteve digjitale.
Ndërkohë, media franceze “Le Télégramme” raportoi se dëmi mund të arrinte në 133 milionë dollarë, por kjo shifër nuk është konfirmuar nga banka. Institucioni pranoi se bëhet fjalë për humbje të konsiderueshme, ndërsa vlera përfundimtare është ende në proces vlerësimi.
Pavarësisht përmasave të sulmit, banka deklaroi se situata nuk rrezikon qëndrueshmërinë e saj financiare. Në gjashtëmujorin e parë të vitit, ajo kishte raportuar një fitim neto prej 230 milionë eurosh.
