nga Skyweb.al
Dy të vdekur dhe dhjetë të lënduar ishte bilanci i shpërthimit të fuqishëm të ndodhur dje në një pallat në Elbasan, ku dyshohet se shkak u bë rrjedhja e gazit.
Sipas të dhënave paraprake, pronari i banesës, një prej viktimave, dyshohet se kishte realizuar një lidhje gazi nga një bombol e vendosur në garazhin e pallatit deri në apartament. Policia dyshon se grumbullimi i gazit në banesë ka shkaktuar shpërthimin, ndërsa hetimet vijojnë.
Fenomeni i përdorimit të bombolave të gazit si një zgjidhje, vërtet më ekonomike, për ngrohjen dhe gatimin është pothuajse po aq i vjetër sa pluralizmi në Shqipëri.
Mungesa e energjisë elektrike në vitet e para të tranzicionit, por edhe shtrenjtimi i druve të zjarrit dhe kostot e ngrohjes, e kthyen gazin në një alternativë për dhjetëra mijëra familje shqiptare.
Por kjo zgjidhje ka mbartur vazhdimisht një rrezik të madh. Rastet e vdekjeve nga asfiksia apo shpërthimet e gazit janë përsëritur ndër vite, aq sa pothuajse çdo dimër dëgjojmë për tragjedi të ngjashme.
Problemi nis që te mënyra e shpërndarjes së gazit, kryesisht përmes bombolave dhe jo një rrjeti tubacionesh të kontrolluar, të ndërtuar sipas standardeve të larta të sigurisë.
Shpërndarja me bombola ka krijuar hapësira që në treg të qarkullojnë edhe pajisje të vjetra, të amortizuara dhe jashtë parametrave të sigurisë teknike.
Kjo problematikë është ngritur vazhdimisht, sidomos pas tragjedive të shkaktuara nga shpërthimet e gazit, por zgjidhja përfundimtare vazhdon të mungojë.
Gjasat janë që edhe pas ngjarjes së Elbasanit të shohim aksione kontrolli nëpër pikat e furnizimit me gaz, inspektime dhe paralajmërime për qytetarët.
Por po aq të mëdha janë gjasat që, pas disa javësh, gjithçka të harrohet deri në tragjedinë e radhës.
Pyetja është nëse ka ardhur koha që shteti ta trajtojë seriozisht dhe përfundimisht këtë problem.
Përse të mos ndalohet qarkullimi i kategorive të bombolave që konsiderohen të rrezikshme? Përse të mos lejohet tregtimi vetëm i bombolave të certifikuara, me kontrolle teknike periodike dhe gjurmueshmëri të plotë?
Përse të mos bëhet i detyrueshëm shkatërrimi i bombolave të amortizuara dhe atyre që nuk plotësojnë standardet e sigurisë?
Po kështu, duhet vendosur rregull edhe për instalimet e gazit në banesa, duke mos lejuar lidhje të improvizuara që mund të rrezikojnë jo vetëm një familje, por një pallat të tërë.
Shteti i ka të gjitha instrumentet ligjore dhe administrative për të vendosur standarde dhe për të kontrolluar tregun.
Çështja është nëse do të zgjedhë ta bëjë këtë përpara tragjedisë së radhës, apo do të vazhdojë të kujtohet për sigurinë e bombolave të gazit vetëm pasi të jenë humbur jetë njerëzish. /skyweb.al
