Taksa vjetore për një pjesë të makinave me naftë pritet të arrijë gati trefishin e nivelit aktual, sipas ndryshimeve të propozuara në Paketën Fiskale 2027.
Për automjetet me motor mbi 2,000 kubikë, komponenti fiks i formulës rritet nga 12.5 në 26 lekë. Krahas tij ndryshojnë edhe koeficientët e vjetërsisë, duke shtuar detyrimin për pronarët.
View this post on Instagram
Sipas Monitor, për një makinë me naftë 10-vjeçare dhe motor 2,500 kubikë, taksa nga 7,500 lekë shkon në 21,450 lekë. Pronari do të paguajë 13,950 lekë më shumë në vit, një rritje prej 186%.
Për një makinë katërvjeçare me të njëjtën cilindratë, detyrimi nga 5,625 lekë arrin në 13,650 lekë. Shtesa është 8,025 lekë, ose rreth 143%.
Rritje të fortë pësojnë edhe makinat me benzinë. Për një automjet 10-vjeçar me motor 2,500 kubikë, taksa nga 6,000 lekë shkon në 17,325 lekë, pothuajse trefishi.
Në skemën e propozuar përfshihen edhe makinat deri në tre vjet të vjetra, të cilat aktualisht përjashtohen nga kjo taksë. Reforma parashikon zhvendosjen e barrës nga taksa e qarkullimit mbi karburantet te detyrimi vjetor i automjeteve.
