Gjirokastra është përfshirë në një listë me gjashtë qytete historike më pak të njohura në botë, por me vlera të rëndësishme kulturore, arkitekturore dhe historike, që rekomandohen si destinacione turistike, shkruan gazeta indiane “The Indian Express”.
Nga portet e lashta tregtare te qendrat mesjetare dhe ish-kryeqytetet mbretërore, këto qytete ofrojnë mundësinë për të zbuluar trashëgiminë e qytetërimeve të ndryshme, larg destinacioneve turistike më të frekuentuara.
E njohur si “Qyteti i Gurtë”, Gjirokastra është pjesë e Listës së Trashëgimisë Botërore të UNESCO-s që prej vitit 2005, falë vlerave të saj të veçanta historike dhe arkitekturore. Qyteti shquhet për banesat tradicionale shumëkatëshe, të ndërtuara kryesisht gjatë shekujve XVII–XIX, me çati prej guri, mure të trasha dhe elemente karakteristike të arkitekturës osmane.
Një nga pikat më të rëndësishme të qytetit është Pazari i Vjetër, i cili për shekuj me radhë ka shërbyer si qendër tregtare dhe zejtare. Rrugët me kalldrëm, banesat karakteristike dhe objektet e kultit i japin qendrës historike një identitet të veçantë.
Në zemër të qytetit ngrihet edhe Kalaja e Gjirokastrës, një prej monumenteve më të rëndësishme historike, e cila ofron pamje panoramike mbi luginën e Drinos. Brenda saj ndodhen hapësira muzeale dhe objekte që dëshmojnë periudha të ndryshme të historisë së vendit.
Gjirokastra njihet gjithashtu për lidhjen me shkrimtarin e madh shqiptar Ismail Kadare, si dhe për Festivalin Folklorik Kombëtar, që zhvillohet në kalanë e qytetit dhe mbledh artistë e grupe folklorike nga Shqipëria dhe trevat shqiptare.
Përveç Gjirokastrës, në përzgjedhjen e “The Indian Express” janë edhe pesë qytete të tjera historike: Colonia del Sacramento në Uruguai, Lamu në Kenia, Matera në Itali, Trogir në Kroaci dhe Visby në Suedi. Të gjitha dallohen për trashëgiminë e tyre historike dhe arkitekturore, duke ofruar alternativa për turistët që kërkojnë të zbulojnë destinacione përtej qyteteve më të njohura. /skyweb.al
