Shqipëria vijon të renditet ndër destinacionet më të përballueshme për turistët në Evropë, shkruan Marco Kopinke në një artikull të publikuar nga media amerikane “Travelbinger”.
Sipas udhëzuesit për vitin 2026, me një buxhet prej 28 dollarësh në ditë, turistët mund të eksplorojnë vendin duke zgjedhur akomodime ekonomike, ushqime me çmime të ulëta dhe transportin publik.
Një itinerar i rekomanduar përfshin Tiranën, Beratin, Gjirokastrën dhe Sarandën, si dhe vizita në Ksamil e Butrint. Për të kursyer, këshillohet udhëtimi jashtë sezonit të verës, qëndrimi në bujtina me dhoma të përbashkëta dhe shmangia e shërbimeve të kushtueshme në plazhe.
Sipas artikullit, një shtrat në bujtina kushton mesatarisht 12–13 euro nata, ndërsa një vakt në restorant varion nga 5 deri në 10 euro. Autobusët dhe furgonët mbeten ndër alternativat më ekonomike për të udhëtuar mes qyteteve.
Për një qëndrim 10-ditor, shpenzimet e përllogaritura arrijnë në rreth 242 euro, ku përfshihen 100 euro për akomodimin, 90 euro për ushqimin, 42 euro për transportin dhe 10 euro për vizitat turistike. Këto shpenzime nuk përfshijnë biletat e avionit.
Artikulli thekson se Shqipëria ofron mundësi për të zbuluar bregdetin, qytetet historike dhe bukuritë natyrore edhe me një buxhet të kufizuar, nëse udhëtimi planifikohet me kujdes. /skyweb.al
