Shqipëria po tërheq vëmendjen e turistëve të huaj si një destinacion me kosto të përballueshme për vitin 2027, shkruan media amerikane “TheStreet”, duke iu referuar raportit të tendencave të udhëtimit të publikuar nga platforma “Skyscanner”.
Sipas raportit, Tirana renditet mes qyteteve që po fitojnë interesin e turistëve të cilët zgjedhin destinacionet bazuar në kursin e këmbimit të valutave, për të përfituar më shumë nga buxheti i tyre.
Nga një anketë me 28 mijë turistë, 41% deklaruan se kishin ndryshuar destinacionin për të përfituar nga një kurs më i favorshëm këmbimi. Te Gjenerata Z, kjo përqindje arrin në 72%.
Kryeqyteti shqiptar përmendet krahas qyteteve si Da Nang në Vietnam, Wrocław në Poloni dhe Bishkek në Kirgistan. Kombinimi i historisë, kulturës, gastronomisë dhe jetës urbane, së bashku me kostot relativisht të përballueshme të akomodimit, ushqimit dhe transportit, e bëjnë Tiranën një alternativë tërheqëse për turistët me buxhet të kufizuar.
Sipas të dhënave të cituara në artikull, një hotel i kategorisë së mesme në Tiranë kushton rreth 50–90 euro nata, ndërsa një vakt në një restorant ekonomik rreth 800 lekë.
Raporti i “Skyscanner” evidenton edhe tendenca të tjera për vitin 2027, përfshirë udhëtimet e organizuara për blerjen e produkteve të veçanta dhe udhëtimet më të gjata të frymëzuara nga historia dhe qytetërimet e lashta. /skyweb.al
