Një kompani teknologjike në Itali ka vendosur të pushojë nga puna të gjithë punonjësit e saj në një zyrë në Venecia, duke i zëvendësuar me sisteme të bazuara në inteligjencë artificiale, raporton Ansa.
Kompania InvestCloud Italy, me seli në Marghera pranë Venecias, ka nisur procedurat për shkarkimin kolektiv të 37 punonjësve, pasi ka vendosur të mbyllë zyrën e saj të vetme në Itali. Vendimi është pjesë e një transformimi më të gjerë të kompanisë, e cila synon të kalojë në një model të ri pune të mbështetur kryesisht në teknologji dhe inteligjencë artificiale.
Sipas raportimeve të mediave italiane, kompania u ka komunikuar vendimin sindikatave dhe organizatave të industrisë, duke theksuar se modeli i ri organizativ i grupit amerikan bazohet në sisteme të integruara me AI, të cilat nuk kërkojnë më struktura të veçanta lokale për mirëmbajtje dhe operim.
Shkurtimi i vendeve të punës është pjesë e një procesi transformimi që ka nisur prej rreth 18 muajsh brenda grupit InvestCloud, i cili synon të ndërtojë një platformë të unifikuar teknologjike të fokusuar në zgjidhje të bazuara në inteligjencën artificiale.
Ndërkohë, punonjësit pritet të zhvillojnë takime në ditët në vijim për të shqyrtuar mundësitë ligjore për kundërshtimin e vendimit dhe për të diskutuar situatën me autoritetet rajonale në Veneto. /skyweb.al
