Europa mund të përballet shumë shpejt me mungesë të karburantit për avionë, duke rrezikuar anulime të shumta fluturimesh. Paralajmërimi vjen nga drejtori i Agjencisë Ndërkombëtare të Energjisë, Fatih Birol, i cili deklaroi se rezervat mund të mjaftojnë vetëm për rreth gjashtë javë nëse situata në Lindjen e Mesme nuk ndryshon.
Kriza lidhet drejtpërdrejt me bllokimin e Ngushticës së Hormuzit, një nga arteriet kryesore të tregtisë globale të energjisë, përmes së cilës kalon rreth një e pesta e furnizimit botëror.
Sipas Birol, situata aktuale përbën një nga krizat më të mëdha energjetike të regjistruara ndonjëherë, me pasoja të drejtpërdrejta për ekonominë globale.
Ai paralajmëroi se nëse rrjedha e furnizimit nuk rikthehet, shumë shpejt do të fillojnë anulimet e fluturimeve në Europë për shkak të mungesës së karburantit për avionë.
Ndikimi pritet të reflektohet edhe në rritjen e çmimeve të karburantit, gazit dhe energjisë elektrike, duke ushtruar presion të shtuar mbi inflacionin.
Sipas tij, vendet në zhvillim do të jenë më të goditurat nga kjo krizë, ndërsa efektet do të përhapen më pas në Europë dhe Amerikë. Ndërkohë, industria e aviacionit ka nisur të ndjejë pasojat, me kompani që paralajmërojnë humbje dhe ulje të kërkesës për fluturime.
Organizatat e aeroporteve europiane kanë ngritur gjithashtu alarmin, duke theksuar se nëse furnizimi nuk stabilizohet brenda tre javësh, mungesa e karburantit për avionë mund të kthehet në një problem sistemik për Bashkimin Europian, pikërisht në prag të sezonit veror.
Edhe në rast të një marrëveshjeje, dëmtimet në infrastrukturën energjetike në rajon pritet të zgjasin efektet e krizës për muaj apo edhe vite, duke e bërë rikthimin në normalitet një proces të ngadaltë. /skyweb.al
