Nga raftet e supermarketeve te kroasantët, kafetë e ftohta dhe tortat e dasmave, tiramisu po përjeton një valë të re popullariteti. Ëmbëlsira italiane po tërheq konsumatorët përtej recetës tradicionale, duke nxitur shitjet dhe hapjen e bizneseve të specializuara vetëm për të.
Sipas një raporti të Industry Research, të cituar nga Newmoney, tregu botëror i tiramisusë vlerësohet në mbi 1.2 miliardë dollarë në vitin 2026 dhe parashikohet të arrijë në 2.5 miliardë dollarë deri më 2035. Në Itali, vlera e tij llogaritet rreth 350 milionë euro.
Rritja e interesit po ndihet edhe në Britaninë e Madhe. Sipas të dhënave të publikuara nga The Guardian, rrjeti Marks & Spencer ka shënuar një rritje prej 27% të shitjeve të tiramisusë kundrejt një viti më parë. Krahas porcioneve të gatshme, kërkesa po nxit edhe blerjen e përbërësve për përgatitjen në shtëpi, veçanërisht të maskarpones.
Pas këtij suksesi qëndron një recetë me vetëm gjashtë përbërës: sheqer, të verdha vezësh, maskarpone, kafe ekspres, biskota savoiardi dhe kakao e hidhur. Versioni klasik lidhet me restorantin “Le Beccherie” në Treviso, ku u përfshi në menu në vitet 1970.
Sot, pastiçierët po eksperimentojnë me variante me fistik, lajthi, fruta pylli, limon apo çaj matcha. Shija e tiramisusë po përdoret gjithashtu në akullore, kroasantë dhe pije me bazë kafeje, duke e kthyer ëmbëlsirën në një produkt që shitet në shumë forma.
Një tjetër treg po hapet te dasmat. Në vend të tortës tradicionale, disa çifte zgjedhin porcione tiramisuje në gota, të vendosura në formën e një kulle. Organizatorët e ceremonive e rendisin këtë mes prirjeve të vitit 2026.
Popullariteti ka krijuar hapësirë edhe për lokale të dedikuara. Në Londër, “Marrone” ofron vetëm tri variante tiramisuje në kavanoza individualë. Interesi ka qenë aq i madh, sa biznesi është detyruar të mbyllet përkohësisht pasi i mbaruan kavanozat.
Për një ëmbëlsirë me përbërës kaq të thjeshtë, rikthimi në modë po përkthehet në mundësi të reja biznesi, nga prodhimi për supermarketet te pastiçeritë dhe shërbimet për evente. /skyweb.al
