Qeveria pritet të miratojë sot projektbuxhetin e vitit 2027, i cili do të shoqërohet me një paketë të gjerë fiskale që rrit ndjeshëm barrën e taksave për bizneset, me rreth 260–270 milionë euro të ardhura shtesë të parashikuara nga masat kryesore.
Një pjesë e këtyre të ardhurave do të përdoret për të kompensuar uljen e TVSH-së për ushqimet bazë nga 20% në 6%, ndërsa pjesa tjetër do të mbetet si të ardhur shtesë në arkën e shtetit.
Sipas dokumenteve buxhetore të analizuara nga Skyweb.al, qeveria parashikon për vitin 2027 një buxhet me shpenzime prej 916.4 miliardë lekësh, ose afërsisht 10 miliardë euro, ndërsa të ardhurat llogariten në 870.6 miliardë lekë, rreth 9.3 miliardë euro.
Diferenca ndërmjet të ardhurave dhe shpenzimeve krijon një deficit buxhetor prej rreth 45.8 miliardë lekësh, ose 1.6% të Prodhimit të Brendshëm Bruto, i cili do të duhet të financohet përmes burimeve të tjera, përfshirë huamarrjen.
Krahasuar me parashikimet për vitin 2026, të ardhurat buxhetore rriten me rreth 47.5 miliardë lekë, ndërsa shpenzimet me afro 29.6 miliardë lekë.
Një nga prioritetet e parashikuara të buxhetit mbetet mbështetja e pensionistëve, për të cilët janë planifikuar fonde shtesë.
Në dokumentin fillestar, fondi për bonusin e pensionistëve rritet nga 10 miliardë lekë në vitin 2026 në 15 miliardë lekë në vitin 2027, ose 50% më shumë.
Ndërkohë, shpenzimet për sigurimet shoqërore parashikohen të rriten nga 204.1 miliardë në 214.1 miliardë lekë, ndërsa janë parashikuar edhe fonde për politika të reja pensionesh.
Por situata paraqitet ndryshe për pagat e administratës publike.
Sipas parashikimeve fillestare, fondi i pagave rritet nga 119.46 miliardë lekë në 119.69 miliardë lekë, ose vetëm 0.2%, duke mos treguar një hapësirë të konsiderueshme financiare për rritje të përgjithshme pagash.
Madje, dokumenti parashikon fonde të veçanta për indeksimin e pagave gjatë viteve 2028 dhe 2029, por jo një fond të ngjashëm të identifikuar për vitin 2027.
Nga ana tjetër, paketa fiskale që shoqëron buxhetin propozon rritjen e TVSH-së së përgjithshme në 21%, tatimfitimit në 17%, dividendit në 15% dhe përfshirjen e mbi 17 mijë bizneseve të tjera në skemën e TVSH-së.
Në total, pasi zbriten efektet e lehtësimit të TVSH-së për ushqimet dhe të tatimit mbi pagat, masat kryesore fiskale parashikojnë një efekt neto pozitiv prej rreth 10 miliardë lekësh në vit për buxhetin. /skyweb.al
