Qeveria pritet të miratojë në mbledhjen e nesërme një paketë me ndryshime të mëdha fiskale, të cilat parashikojnë rreth 270 milionë euro të ardhura shtesë bruto në vit nga rritja e taksave dhe zgjerimi i bazës tatimore, sipas përllogaritjeve mbi efektet financiare të masave të propozuara.
Bëhet fjalë për një nga ndërhyrjet më të forta në politikën fiskale të viteve të fundit, me ndryshime që prekin drejtpërdrejt biznesin, por edhe konsumatorët.
Qeveria duket se ka zgjedhur të ndërmarrë një kthesë të fortë në politikat fiskale, 13 vite pasi Partia Socialiste erdhi për herë të parë në pushtet, duke rikthyer edhe premtimin e vitit 2013 për uljen e TVSH-së së ushqimeve bazë.
Ndryshimet janë të konsiderueshme dhe reagimet e sotme të përfaqësuesve të biznesit tregojnë se propozimet i kanë kapur “gafil”.
Por ajo që e bën edhe më të pazakontë këtë paketë është mënyra dhe koha në të cilën ajo është përgatitur.
Burime të skyweb.al bëjnë me dije se e gjithë Paketa Fiskale është përgatitur brenda pak orësh gjatë ditës së djeshme (e hënë, sh.r).
Sipas burimeve të afërta me grupin e punës, gjatë mëngjesit të djeshëm është dhënë urdhri: “Keni 8 orë kohë”.
Pas këtij urdhri, gjatë pasdites së vonë, ndryshimet fiskale, me një ndikim financiar shumë të madh mbi biznesin dhe ekonominë, janë hedhur e zeza mbi të bardhë në dokumente zyrtare, për t’iu paraqitur më pas biznesit gjatë mbrëmjes.
Ndryshimet e propozuara (të cilat mund ti lexoni KËTU) mund të ndikojnë ndjeshëm në klimën e biznesit, ndërsa rritja e taksave ngre pikëpyetje për kostot e kompanive, investimet dhe çmimet që do të paguajnë konsumatorët.
Miratimi i ndërhyrjeve të tilla në sistemin fiskal normalisht kërkon kohë, analiza të ndikimit ekonomik dhe konsultime të gjera me grupet e interesit, veçanërisht me biznesin.
Reagimet e organizatave të biznesit gjatë ditës së sotme kanë qenë kundërshtuese. Bashkimi i Prodhuesve Shqiptarë dhe Dhoma e Tregtisë dhe Industrisë Tiranë kanë kërkuar konsultime dhe rishikimin e propozimeve, duke paralajmëruar pasoja për sipërmarrjet, investimet dhe çmimet.
Dhoma e Tregtisë ka deklaruar madje se i kishte dërguar propozimet e saj Ministrisë së Financave më 9 tetor, por nuk kishte marrë përgjigje dhe se paketa nuk ishte prezantuar zyrtarisht në një takim konsultues me organizatat e biznesit. /skyweb.al
