Turizmi dhe udhëtimet personale vijojnë të mbeten arsyeja kryesore e hyrjes së shtetasve të huaj në Shqipëri, ndërsa hyrjet për biznes dhe qëllime profesionale kanë shënuar rënie.
Sipas të dhënave të INSTAT për muajin maj 2026, 98% e hyrjeve të shtetasve të huaj në territorin shqiptar janë kryer për qëllime personale. Në këtë kategori përfshihen pushimet, vizitat tek të afërmit, trajtimet shëndetësore, qëllimet fetare dhe udhëtarët tranzit.
Ky tregues ka shënuar rritje me 16.4% krahasuar me majin e vitit 2025, duke konfirmuar se fluksi kryesor i të huajve drejt Shqipërisë lidhet me turizmin dhe lëvizjet personale.
Nga ana tjetër, hyrjet e shtetasve të huaj për qëllime biznesi dhe profesionale kanë rënë me 5.6%, çka tregon një tkurrje të kësaj kategorie krahasuar me të njëjtën periudhë të një viti më parë.
Në total, gjatë muajit maj 2026 në Shqipëri kanë hyrë 1,143,595 shtetas të huaj, me rritje 15.9% krahasuar me majin 2025.
Të dhënat tregojnë se sezoni turistik ka nisur me ritme të larta, por struktura e hyrjeve mbetet e përqendruar pothuajse tërësisht te udhëtimet personale, ndërsa segmenti i biznesit ka pësuar rënie.
