Eksportet shqiptare kanë shënuar rënie të fortë gjatë vitit 2025, në një kohë kur dobësimi i euros ndaj lekut ka shtuar presionin mbi bizneset që shesin jashtë vendit.
Sipas të dhënave të INSTAT, eksportet e mallrave arritën në 346 miliardë lekë, duke u ulur me 6.1% krahasuar me vitin 2024 dhe me 5.7% krahasuar me vitin 2021.
Në të njëjtën periudhë, importet arritën në 887 miliardë lekë dhe ranë vetëm me 0.8% krahasuar me një vit më parë, ndërsa krahasuar me 2021 rezultojnë 10.8% më të larta.
Kjo tregon se goditja më e madhe në tregtinë e jashtme është përqendruar te eksportet, ndërsa varësia nga mallrat e importuara mbetet shumë e lartë.
Forcimi i lekut ndaj euros i bën produktet shqiptare më të shtrenjta për blerësit e huaj dhe ul të ardhurat në lekë të eksportuesve për të njëjtën vlerë të shitur në euro.
Për pasojë, mallrat shqiptare bëhen më pak konkurruese në tregjet ndërkombëtare, duke rritur rrezikun e humbjes së kontratave dhe tregjeve të fituara ndër vite.
Dobësimi i eksporteve ka ndikuar edhe në përkeqësimin e bilancit tregtar, i cili sipas INSTAT u rrit me 3% krahasuar me vitin 2024 dhe me 24.8% krahasuar me vitin 2021.
Në vitin 2025, Shqipëria importoi mbi 2.5 herë më shumë mallra sesa eksportoi, një raport që tregon hendekun e madh mes prodhimit vendas dhe konsumit të mbështetur te importet.
Tregu kryesor i eksporteve shqiptare mbetet Bashkimi Europian, ku shkon 72.5% e totalit të eksporteve, por edhe eksportet drejt vendeve të BE-së ranë me 5% krahasuar me 2024.
Italia vijon të jetë partneri kryesor tregtar i Shqipërisë, me 41.9% të eksporteve, por shitjet drejt këtij tregu ranë me 10.4% brenda një viti.
Rënia drejt Italisë është veçanërisht e rëndësishme, pasi ky treg lidhet ngushtë me industrinë fason dhe sektorët prodhues që operojnë me kontrata në euro.
Ndërkohë, në importe bie në sy rritja e Kinës, e cila zë 13.4% të importeve dhe shënoi rritje me 21.6% krahasuar me vitin 2024. /skyweb.al
