Biznesmeni Behgjet Pacolli ka reaguar sërish për konfliktin lidhur me Aeroportin Ndërkombëtar të Vlorës, duke paralajmëruar se çështja mund të përfundojë në arbitrazhin ndërkombëtar ICSID pranë Bankës Botërore në Uashington.
Sipas Pacollit, MABCO, e cila zotëron 98% të kuotave të shoqërisë koncesionare VIA, është penguar që prej vitit të kaluar të marrë pjesë në vendimmarrjen e kompanisë dhe të ushtrojë të drejtat që burojnë nga pronësia e saj.
Ai pretendon se kjo situatë ka ndikuar drejtpërdrejt në bllokimin e punimeve në aeroport. Pacolli shton se, prej prillit 2026, MABCO-s i është pamundësuar edhe hyrja në hapësirat dhe objektet e ndërtuara me investimet e kompanisë.
Pasi përpjekjet për zgjidhjen e konfliktit nuk kanë dhënë rezultat, MABCO u ka dërguar autoriteteve shqiptare një “Notice of Dispute”, ose Njoftim të Mosmarrëveshjes. Procedura është nisur në bazë të marrëveshjes dypalëshe ndërmjet Zvicrës dhe Shqipërisë për mbrojtjen e investimeve.
Palët ndodhen tashmë në periudhën gjashtëmujore të negociatave, gjatë së cilës mund të kërkohet një marrëveshje për të shmangur arbitrazhin ndërkombëtar.
Pacolli deklaron se MABCO u ka kërkuar vazhdimisht autoriteteve shqiptare dialog dhe një zgjidhje të arsyeshme, por deri tani nuk ka marrë përgjigje konkrete.
“MABCO mbetet e gatshme për dialog dhe për një zgjidhje të drejtë dhe të qëndrueshme”, shkruan Pacolli, duke theksuar se shmangia e përshkallëzimit të mosmarrëveshjes varet tashmë nga gatishmëria e autoriteteve shqiptare për t’u angazhuar në negociata.
