Pothuajse gjysma e familjeve shqiptare nuk kanë mundësi të përballojnë një shpenzim të papritur prej 1 mijë eurosh pa marrë borxh apo pa kërkuar ndihmë financiare nga të afërmit dhe persona të tjerë.
Të dhënat dalin nga raporti SecuriMeter 2026 i Këshillit të Bashkëpunimit Rajonal (RCC), i cili evidenton vështirësitë financiare të familjeve në gjashtë vendet e Ballkanit Perëndimor.
46% e të anketuarve në Shqipëri deklarojnë se familja e tyre nuk do të ishte në gjendje të përballonte një shpenzim të paparashikuar prej 1 mijë eurosh përmes burimeve të veta financiare.
Vetëm 35% shprehen se kanë mundësi ta përballojnë një shpenzim të tillë pa marrë hua, ndërsa 19% nuk janë të sigurt nëse të ardhurat dhe kursimet familjare do t’ua lejonin.
Kjo do të thotë se një shpenzim i papritur, si një ndërhyrje mjekësore, riparimi i automjetit apo një problem në banesë, mund të krijojë vështirësi të menjëhershme financiare për një pjesë të konsiderueshme të familjeve shqiptare.
Ajo që bie në sy është se Shqipëria ka përqindjen më të lartë në rajon të qytetarëve që deklarojnë pamundësi për të përballuar një shpenzim të tillë.
Në Maqedoninë e Veriut, 41% e të anketuarve shprehen se nuk mund të përballojnë një emergjencë financiare prej 1 mijë eurosh, ndërsa në Kosovë kjo përqindje është 37%.
Situata paraqitet disi më e mirë në Serbi, ku 31% deklarojnë pamundësi financiare, në Bosnjë dhe Hercegovinë me 30% dhe në Mal të Zi me 29%.
Pra, Shqipëria ka një diferencë prej 10 pikësh përqindjeje mbi mesataren rajonale prej 36% të qytetarëve që nuk mund të përballojnë një shpenzim të tillë.
Megjithatë, statistikat evidentojnë edhe një kontrast interesant.
Shqipëria rezulton njëkohësisht vendi me përqindjen më të lartë të përgjigjeve pozitive, me 35.4% të qytetarëve që deklarojnë se mund ta përballojnë një shpenzim prej 1 mijë eurosh.
Pas saj renditen Mali i Zi me 34.4% dhe Bosnja e Hercegovina me 33.9%.
Ky kontrast sugjeron një ndarje të fortë mes familjeve që disponojnë burime financiare për situata emergjente dhe atyre që kanë pak ose aspak mundësi për të përballuar shpenzime të paparashikuara.
Në nivelin e gjashtë vendeve të Ballkanit Perëndimor, 36% e të anketuarve deklarojnë se nuk mund ta përballojnë një shpenzim të tillë, 31% nuk janë të sigurt dhe 33% kanë mundësi financiare.
Të dhënat tregojnë se dobësia financiare e familjeve nuk është një problem vetëm shqiptar, por prek një pjesë të konsiderueshme të popullsisë së rajonit.
Megjithatë, Shqipëria paraqet një nivel më të lartë të pamundësisë së deklaruar për përballimin e një emergjence financiare.
Mungesa e rezervave të mjaftueshme financiare do të thotë se një pjesë e familjeve mund të detyrohen të marrin hua, të shtyjnë pagesa të tjera apo të reduktojnë konsumin për të përballuar shpenzime të papritura.
Raporti SecuriMeter 2026 është realizuar përmes intervistave me 6,003 qytetarë në gjashtë vendet e Ballkanit Perëndimor, gjatë periudhës 1–17 shtator 2026.
Studimi, i prezantuar më 18 nëntor, pasqyron perceptimet dhe mundësitë financiare të deklaruara nga të anketuarit, duke nxjerrë në pah vështirësitë e përballimit të kostove të jetesës dhe pasigurinë ekonomike në rajon.















