Bitcoin ka përjetuar luhatje të forta gjatë 24 orëve të fundit, duke zbritur në nivelin më të ulët të dy viteve, përpara se të rikuperonte afro 5 mijë dollarë brenda pak orësh.
Kriptomonedha më e madhe në botë, sipas kapitalizimit të tregut, ra deri në 55.251 dollarë gjatë së shtunës, 21 nëntor, duke prekur nivelin më të ulët që prej shtatorit 2024.
Megjithatë, pas rënies së fortë, Bitcoin nisi një rikuperim të shpejtë, duke kaluar sërish kufirin psikologjik të 60 mijë dollarëve.
Sipas të dhënave të raportuara nga Reuters, në orën 16:16, sipas kohës së Shqipërisë, Bitcoin tregtohej me 60.192 dollarë, rreth 4.940 dollarë mbi nivelin minimal të regjistruar më herët.
Lëvizjet e forta të kriptomonedhës vijnë në një moment pasigurie të konsiderueshme në tregjet financiare ndërkombëtare, ku investitorët po tërhiqen nga aktivet me rrezik të lartë.
Një ndër faktorët kryesorë që ka ndikuar në këtë situatë është shqetësimi për mbivlerësimin e kompanive të teknologjisë, veçanërisht atyre të lidhura me inteligjencën artificiale.
Investimet gjigante në infrastrukturën e inteligjencës artificiale kanë ngritur pikëpyetje për përfitueshmërinë e tyre, duke shkaktuar shitje masive të aksioneve në bursat amerikane.
Kjo situatë është reflektuar edhe në tregun e kriptomonedhave, ku Bitcoin po shfaq një lidhje gjithnjë e më të fortë me ecurinë e aksioneve të kompanive teknologjike.
Sipas Reuters, forcimi i dollarit amerikan, rritja e kostove të huamarrjes dhe pasiguritë mbi politikën monetare kanë ushtruar presion shtesë mbi tregun.
Rënia e Bitcoin ka përkuar me një javë tepër negative për Wall Street, ku indekset kryesore amerikane kanë regjistruar humbje të konsiderueshme.
Në kushte të tilla, investitorët priren të reduktojnë ekspozimin ndaj instrumenteve spekulative, duke preferuar likuiditetin dhe investimet që perceptohen si më të sigurta.
Megjithëse rikuperimi i së shtunës ka qenë i ndjeshëm, luhatjet e forta tregojnë se pasiguria në tregun e kriptomonedhave mbetet e lartë.
Zhvillimet në bursat amerikane, vendimet e ardhshme të Rezervës Federale dhe ecuria e sektorit të teknologjisë pritet të jenë ndër faktorët që do të ndikojnë drejtimin e Bitcoin gjatë ditëve në vijim. /skyweb.al















