Presidenti i Republikës, Bajram Begaj, ka zgjedhur të festojë Ditën e Alfabetit me përfaqësues të Shoqatës Atdhetare Kulturore “Tomorri”, me rastin e 120-vjetorit të themelimit të saj.
Presidenti Begaj në 120-vjetorin e Shoqatës “Tomorri”: Trashëgimia kulturore duhet t’u përcillet brezave të rinjGjatë aktivitetit të organizuar këtë të diel, kreu i shtetit vlerësoi kontributin historik të shoqatës në ruajtjen e gjuhës, kulturës dhe traditave shqiptare, duke theksuar rëndësinë e përcjelljes së kësaj trashëgimie te brezat e rinj.
Begaj u ndal te roli që shoqatat patriotike kanë luajtur në periudhën e Rilindjes Kombëtare, kur përpjekjet për gjuhën dhe arsimin shqip u shndërruan në një nga faktorët kryesorë të bashkimit kombëtar.
“Përkon bukur që këtë 120-vjetor e festojmë në Ditën e Alfabetit, sepse Shoqata ‘Tomorri’ lindi në një kohë kur shqiptarët po bënin përpjekje të mëdha për gjuhën, shkollën, kulturën dhe afirmimin e identitetit të tyre kombëtar”, u shpreh Presidenti.
Ai kujtoi se dy vjet pas themelimit të shoqatës, Kongresi i Manastirit i vitit 1908 do të miratonte alfabetin e njësuar të gjuhës shqipe, duke kurorëzuar përpjekjet e atdhetarëve nga krahina, besime dhe rryma të ndryshme.
Presidenti përmendi gjithashtu lidhjet historike të Shoqatës “Tomorri” me figura të rëndësishme të historisë shqiptare, mes tyre Fan Nolin dhe Mid’hat Frashërin, të cilët kanë qenë përfaqësues të saj përkatësisht në Shtetet e Bashkuara të Amerikës dhe në Greqi.
“Dita e Alfabetit na e kujton këtë ndoshta më qartë se çdo datë tjetër. Në Manastir shqiptarët nuk hoqën dorë nga dallimet mes tyre; ata u përbashkuan përmes gjuhës”, deklaroi Begaj.
Sipas tij, alfabeti i njësuar i dha shqipes një sistem të përbashkët shkrimi, ndërsa shkolla, libri, letërsia dhe puna e brezave e shndërruan gjuhën në një nga shtyllat më të forta të identitetit kombëtar.
Kreu i shtetit vlerësoi edhe veprimtarinë e Shoqatës “Tomorri” pas rithemelimit, veçanërisht në studimin e historisë, folklorit dhe etnokulturës, përmes botimeve dhe bashkëpunimit me institucionet shkencore e akademike.
Në fjalën e tij, Begaj theksoi se ruajtja e trashëgimisë kulturore merr rëndësi të veçantë në kushtet kur shoqëria po ndryshon me shpejtësi dhe një pjesë e të rinjve largohen nga vendlindja.
Ai u bëri thirrje drejtuesve të shoqatës të përfshijnë më shumë të rinjtë, shkollat dhe studiuesit në veprimtaritë e tyre, si dhe të nxisin iniciativa për mbrojtjen e natyrës.
“Një traditë mbetet e gjallë kur brezi i ri e njeh, e çmon dhe zgjedh ta çojë përpara”, theksoi Presidenti.
Në përfundim, Begaj uroi që Shoqata Atdhetare Kulturore “Tomorri” të vijojë misionin e saj në ruajtjen dhe promovimin e trashëgimisë historike e kulturore shqiptare.















