Studiuesit po përdorin robotë për të identifikuar dhe shkatërruar qelizat e kancerit që arrijnë t’i mbijetojnë trajtimeve, një zhvillim që mund të përshpejtojë zbulimin e terapive më efektive për të vonuar ose parandaluar rikthimin e sëmundjes, shkruan Reuters.
Këto qeliza, të njohura si “qeliza rezistente”, janë shumë të rralla – vetëm një në një mijë qeliza tumorale – por mund të shkaktojnë rikthimin e kancerit. Duke analizuar mostra të kancerit të mushkërive, studiuesit identifikuan afro 10 mijë variante qelizore që mund t’i ndihmojnë qelizat të shmangin efektet e trajtimit.
Për të testuar dozat e ndryshme të ilaçeve të mundshme kundër këtyre qelizave, do të duheshin rreth 10 mijë eksperimente njëjavore. Për këtë arsye, ekipi ndërtoi një platformë robotike me mijëra tumore miniaturë të vendosura në enë laboratorike brenda inkubatorëve të kontrolluar. Një krah robotik lëvizte mostrat mes stacioneve eksperimentale.
Nga 94 barna të testuara, nëntë treguan vazhdimisht efikasitet, duke sugjeruar se qelizat rezistente mund të kenë dobësi të përbashkëta pavarësisht trajtimit që kanë marrë pacientët. Sipas autorëve të studimit, të publikuar në revistën shkencore Science Advances, ky zbulim mund të ndihmojë në parashikimin e terapive më premtuese kundër rikthimit të kancerit. /skyweb.al
