Bizneset nuk do të lejohen t’u kërkojnë klientëve komisione shtesë për përdorimin e kartave bankare që përfshihen në rregullimin e ri të tarifave të pagesave.
Dispozita e re ligjore synon të mbrojë konsumatorët nga tarifat shtesë që mund t’u vendosen në momentin kur zgjedhin të paguajnë me kartë në vend të parasë fizike.
Konkretisht, ligji i ri “Për shërbimet e pagesave” përcakton se se përfituesi i pagesës nuk mund të kërkojë tarifa për përdorimin e instrumenteve të pagesës, për të cilat tarifat e shkëmbimit rregullohen nga Banka e Shqipërisë.
Kjo do të thotë se një dyqan, restorant apo subjekt tjetër tregtar nuk mund t’i shtojë klientit një pagesë të veçantë vetëm për faktin se ai përdor një kartë bankare të mbuluar nga ky rregullim.
Për shembull, nëse një produkt kushton 5 mijë lekë, tregtari nuk mund t’i kërkojë konsumatorit një shumë shtesë mbi këtë çmim si komision për përdorimin e kartës që përfshihet në ndalim.
Megjithatë, ndryshimi nuk nënkupton heqjen e të gjitha komisioneve të lidhura me pagesat bankare.
Duhet bërë dallimi mes tarifës që një bankë apo operator financiar i ngarkon biznesit për pranimin e pagesës me kartë dhe tarifës shtesë që vetë biznesi mund të përpiqet t’ia transferojë konsumatorit.
Ligji i ri ndërhyn pikërisht te kjo e fundit, duke ndaluar kërkimin e pagesave shtesë nga përfituesi i pagesës për instrumentet që mbulohen nga dispozita.
Ndërkohë, marrëdhënia financiare mes bankës dhe tregtarit, përfshirë komisionet për shërbimin e pranimit të kartave në terminalet POS, vijon të rregullohet sipas kushteve dhe legjislacionit përkatës.
Një tjetër ndryshim lidhet me transfertat e kreditit dhe debitimin direkt, për të cilat ndalimi i tarifave shtesë zbatohet në shërbimet që mbulohen nga kuadri nënligjor përkatës i Bankës së Shqipërisë.
Ligji i jep gjithashtu Bankës së Shqipërisë kompetencën për të përcaktuar me akt nënligjor kërkesat për tarifat e shkëmbimit, si dhe rregullat teknike dhe të biznesit për transaksionet e pagesave të bazuara në kartë.
Tarifa e shkëmbimit është një komponent i kostos së transaksionit, që paguhet ndërmjet institucioneve financiare të përfshira në përpunimin e pagesës.
Kufizimi i këtyre tarifave synon uljen e kostove të pranimit të kartave për bizneset dhe krijimin e kushteve më të favorshme për zgjerimin e pagesave elektronike.
Banka e Shqipërisë ka hedhur më herët për konsultim edhe një projekt-rregullore që propozon tavane prej 0.2% për tarifat e shkëmbimit të pagesave me karta debiti dhe 0.3% për ato me karta krediti.
Këto përqindje kanë të bëjnë me tarifat ndërmjet operatorëve financiarë dhe nuk duhen ngatërruar me një komision që paguhet drejtpërdrejt nga konsumatori në arkën e biznesit.
Gjithashtu, fusha e zbatimit të ndalimit nuk përfshin automatikisht çdo lloj karte apo çdo transaksion financiar. Ajo përcaktohet nga kategoritë e instrumenteve të pagesës dhe rregullat përkatëse të Bankës së Shqipërisë.
Ndryshimet janë pjesë e reformës së sistemit të pagesave, përmes së cilës qeveria dhe Banka e Shqipërisë synojnë të reduktojnë përdorimin e parasë fizike dhe të rrisin pagesat elektronike.
Sipas Ministrisë së Financave, ligji i ri synon gjithashtu përafrimin e sistemit shqiptar të pagesave me standardet e Bashkimit Europian, forcimin e transparencës dhe mbrojtjen e konsumatorëve.
Për qytetarët, ndryshimi më i rëndësishëm është kufizimi i mundësisë që bizneset t’u ngarkojnë një kosto shtesë vetëm për zgjedhjen e mënyrës së pagesës.
Ndërsa për bizneset, reforma synon të krijojë një mjedis ku pranimi i pagesave elektronike të bëhet më konkurrues, me kosto më të ulëta dhe me rregulla më të qarta. /skyweb.al
