Çmimet e lartai janë shqetësimi më madhor ekonomik për qytetarët shqiptarë gjatë vitit 2025, sipas Barometrit të Ballkanit të publikuar nga Këshilli i Bashkëpunimit Rajonal.
Të dhënat tregojnë se 72 për qind e shqiptarëve i konsiderojnë çmimet si problem kryesor, niveli më i lartë në rajon pas Kosovës, ku 77 për qind e qytetarëve e rendisin inflacionin si sfidën më të rëndësishme.
Në nivel rajonal, rritja e çmimeve vazhdon të kryesojë listën e shqetësimeve, të përmendur nga 66 për qind e të anketuarve, një rritje e lehtë nga viti 2024. Situata e përgjithshme ekonomike mbetet në vend të dytë me 44 për qind, ndërsa korrupsioni vijon të shihet si një sfidë e rëndë nga 35 për qind e qytetarëve.
Ndërkohë, të dhënat e Barometrit tregojnë se qytetarët e Ballkanit Perëndimor po e shohin bashkëpunimin rajonal si një mjet të rëndësishëm progresi. Pothuajse gjysma e të anketuarve deklarojnë se u japin më shumë rëndësi elementeve që i afrojnë vendet e rajonit sesa atyre që i ndajnë, ndërsa vetëm 14 për qind theksojnë dallimet.
Optimizmi për integrimin evropian është rritur në të gjithë BP6-ën. Mbështetja për anëtarësimin në BE ka arritur në 64 për qind, niveli më i lartë në një dekadë. Shqipëria kryeson me 86 për qind mbështetje, e ndjekur nga Kosova me 78 për qind. Rënia e skepticizmit është e dukshme: vetëm 9 për qind e qytetarëve në rajon e konsiderojnë anëtarësimin një zhvillim “të keq”, nga 20 për qind në 2016.
Pritjet për anëtarësimin në BE janë bërë më optimiste. Një pjesë në rritje e qytetarëve beson se integrimi mund të ndodhë deri në vitin 2030 ose 2035, ndërsa bie numri i atyre që mendojnë se procesi do të zgjasë përtej vitit 2040 apo që nuk do të ndodhë kurrë.
Barometri evidenton gjithashtu rritje të ndjeshme në përdorimin e shërbimeve digjitale. Blerjet online janë rritur në 44 për qind nga 36 për qind një vit më parë, ndërsa përdorimi i shërbimeve bankare online ka arritur në 37 për qind. Përdorimi i inteligjencës artificiale është trefishuar, duke arritur në 29 për qind, ndërsa shërbimet e transmetimit të videos kanë shënuar rritje të qëndrueshme. Në të njëjtën kohë, shqetësimi për krimet në internet dhe sigurinë e pagesave online ka rënë dukshëm.
Ndër sfidat mjedisore, ndotja e ajrit mbetet problemi më i përmendur në BP6, duke arritur 61 për qind, e ndjekur nga ndotja e ujit dhe e tokës që kanë shënuar rritje krahasuar me vitin e kaluar.
Institucionet fetare, ushtria dhe Bashkimi Evropian gëzojnë nivelet më të larta të besimit publik, ndërsa partitë politike, parlamentet dhe mediat sociale janë institucionet ndaj të cilave qytetarët shprehin mosbesimin më të madh.
Të rinjtë e rajonit shfaqin një optimizëm të fortë për integrimin evropian. 71 për qind e tyre e konsiderojnë anëtarësimin në BE pozitiv për ekonominë, niveli më i lartë i regjistruar në pesë vitet e fundit. Ndaj tyre, çmimet e larta, papunësia, emigrimi dhe cilësia e arsimit mbeten sfidat kryesore që ndikojnë perceptimin e së ardhmes në rajon.
