Qytetarët dhe bizneset që nuk paguajnë taksën e pronës mund të përballen me bllokim të disa shërbimeve publike.
Në projektligjin e ri “Për taksën mbi pasurinë e paluajtshme”, i hedhur për konsultim nga qeveria, për të cilin skyweb.al ka raportuar edhe më herët, parashikohet që debitorëve të taksës së pronës t’u pezullohen shërbime nga disa institucione qendrore, përfshirë Agjencinë Shtetërore të Kadastrës, Qendrën Kombëtare të Biznesit, Agjencinë e Zhvillimit të Territorit dhe Drejtorinë e Përgjithshme të Shërbimeve të Transportit Rrugor.
Ndryshon taksa e shtëpive, përgjysmë për apartamentin e parë: Çfarë parashikon ligji i ri i qeverisë
Kjo do të thotë se detyrimet e papaguara për taksën e pronës mund të pengojnë qytetarët apo subjektet private në marrjen e shërbimeve që lidhen me pronat, bizneset, lejet zhvillimore apo automjetet.
Projektligji nuk përcakton në mënyrë të detajuar listën konkrete të shërbimeve që do të pezullohen. Këto do të përcaktohen me vendim të Këshillit të Ministrave.
Masa synon të rrisë mbledhjen e taksës së pronës, e cila sipas relacionit aktualisht mbetet larg potencialit të saj. Qeveria argumenton se sistemi i ri do të krijojë një administrim më të fortë dhe më efektiv të kësaj takse, duke e kthyer atë në një burim më të qëndrueshëm të ardhurash për bashkitë.
Taksa e re mbi pasurinë e paluajtshme do të administrohet nga bashkitë dhe Drejtoria e Përgjithshme e Taksës së Pasurisë, mbi bazën e një sistemi të qendërzuar të të dhënave dhe vlerësimit të pronave. /skyweb.al
