Shqipëria shënon sot një ditë historike në aviacionin civil, me nisjen e fluturimeve të para direkte transoqeanike mes vendit tonë dhe Kanadasë.
Siç konstaton skyweb.al përmes Flightradar, avioni Airbus A330 i kompanisë Air Transat pritet të mbërrijë sot në mesditë në Aeroportin Ndërkombëtar të Tiranës, duke realizuar fluturimin e parë pa ndalesë nga Toronto drejt Tiranës.
Kjo linjë shënon lidhjen e parë ajrore direkte mes Shqipërisë dhe Amerikës së Veriut, si edhe fluturimin e parë transoqeanik nga Aeroporti i Tiranës.
Më herët, Tirana International Airport kishte njoftuar hapjen e linjës Tiranë–Toronto, duke e cilësuar atë si një moment të rëndësishëm për zgjerimin e lidhjeve ajrore të Shqipërisë me destinacionet ndërkontinentale.
HISTORIKE/ Për herë të parë fluturime direkte Shqipëri–Kanada nga TIA përmes Air Transat
Linja do të operohet me një Airbus A330-200, me kapacitet rreth 350 vende. Fluturimet do të jenë javore dhe do të vijojnë gjatë sezonit veror deri më 9 tetor 2026.
Hapja e kësaj linje i përgjigjet kërkesës në rritje për udhëtime direkte mes Shqipërisë, rajonit dhe Kanadasë. Sipas TIA-s, rreth 60 mijë pasagjerë në vit lëvizin në këtë drejtim, kryesisht për turizëm, vizita familjare dhe nevojat e komuniteteve të diasporës.
Ndiqeni LIVE
Në Kanada jeton një komunitet i gjerë shqiptar dhe rajonal, i cili prej vitesh ka kërkuar një lidhje më të shpejtë dhe më të thjeshtë me Shqipërinë. Fluturimi direkt Tiranë–Toronto pritet të lehtësojë ndjeshëm udhëtimin, duke shmangur ndalesat në aeroporte të tjera europiane.
Linja e re pritet të ketë ndikim edhe në turizëm, biznes dhe shkëmbimet kulturore, ndërsa Tirana synon të forcojë më tej rolin e saj si një nyje ajrore për rajonin.
Drejtori i Operacioneve i Aeroportit Ndërkombëtar të Tiranës, Piervittorio Farabbi, e cilësoi hapjen e linjës si një arritje madhore për TIA-n dhe për Shqipërinë.
“Hapja e linjës Tiranë–Toronto me Air Transat është një arritje madhore për TIA-n dhe për Shqipërinë. Ky është shërbimi ynë i parë transoqeanik dhe lidhja jonë e parë direkte me Atlantikun e Veriut”, është shprehur Farabbi.
Edhe kompania Air Transat e ka cilësuar këtë destinacion si një hap të rëndësishëm në zgjerimin e rrjetit të saj.
“Jemi krenarë që bëhemi linja ajrore e parë që ofron shërbim direkt pa ndalesë midis Amerikës së Veriut dhe Shqipërisë”, ka deklaruar Sebastian Ponce, Drejtor i të Ardhurave në Air Transat.
Sipas tij, linja do të mbështesë rritjen e turizmit në Shqipëri dhe Ballkan, ndërsa do t’u ofrojë pasagjerëve nga rajoni akses më të lehtë drejt Kanadasë dhe lidhje të mëtejshme në Amerikën e Veriut.
Nisja e fluturimeve Tiranë–Toronto vjen në një periudhë kur trafiku ajror në Shqipëri po rritet me ritme të larta dhe aeroporti i Tiranës po zgjerohet me destinacione të reja direkte.
Me këtë linjë, Shqipëria hyn për herë të parë në hartën e fluturimeve direkte transoqeanike, duke u lidhur pa ndalesë me kontinentin e Amerikës së Veriut. /skyweb.al
