Mbi 90 për qind e familjeve shqiptare kanë tashmë akses në internet fiks, duke shënuar një zgjerim të ndjeshëm të infrastrukturës dixhitale gjatë viteve të fundit. Të dhënat e anketës së INSTAT mbi përdorimin e Teknologjisë së Informacionit dhe Komunikimit për vitin 2025 tregojnë se Shqipëria po afrohet me standardet e vendeve më të zhvilluara në penetrimin e internetit.
Sipas rezultateve, 87.2 për qind e individëve të moshës 16–74 vjeç përdorin internetin, dhe 97.3 për qind e tyre hyjnë online disa herë gjatë ditës, duke e bërë përdorimin e internetit pjesë të pandashme të rutinës së përditshme.
Pothuajse të gjithë përdoruesit, 99.9 për qind, hyjnë në internet përmes telefonit inteligjent, ndërsa përdorimi i pajisjeve të tjera vijon në rritje: 59 për qind përmes Smart TV apo pajisjeve të ngjashme, 41.2 për qind përmes laptopëve dhe 20.9 për qind nga kompjuterët desktop.
Shifrat tregojnë gjithashtu se komunikimi online është bërë universal. Në total, 99.1 për qind e përdoruesve kryejnë thirrje ose video-thirrje përmes platformave si WhatsApp, Viber apo Skype.
Aksesi në internet në Njësitë Ekonomike Familjare arrin në 97.7 për qind, nga të cilat 92.1 për qind përdorin rrjet fiks broadband dhe 99.3 për qind aksesojnë internet përmes lidhjeve mobile broadband.
Rritje të forta janë regjistruar edhe në aktivitetet online të kryera gjatë tre muajve të fundit.
Kërkimi i informacionit për produkte dhe shërbime është rritur me 10.7 pikë përqindje. Internet banking ka shënuar një rritje prej 7.7 pikë përqindje, ndërsa përdorimi i rrjeteve sociale është rritur me 5.7 pikë përqindje.
Shqiptarët vijojnë të adoptojnë shërbimet publike online në mënyrë masive. 99.5 për qind e popullsisë së grupmoshës 16–74 vjeç kanë llogari aktive në platformën e-albania.
Konsumi online është po ashtu në rritje. 45.4 për qind e individëve kanë kryer blerje online gjatë 12 muajve të fundit.
Ndër blerjet më të zakonshme dominojnë rrobat, këpucët dhe aksesorët me 96.5 për qind, ndërsa 61.1 për qind kanë përdorur internetin për shërbime dërgimi ushqimi nga restorantet apo fast food-et.
Treguesit e vitit 2025 konfirmojnë se Shqipëria po hyn në një fazë të konsoliduar të transformimit dixhital, me përdorim masiv të internetit dhe shërbimeve online në të gjitha grupmoshat dhe nivelet sociale. /skyweb.al
