Shqipëria ka vijuar me masat kufizuese ndaj TikTok gjatë vitit 2025, por të dhënat zyrtare tregojnë se përdorimi i internetit dhe rrjeteve sociale ka vijuar të rritet ndjeshëm. Sipas anketës së INSTAT mbi përdorimin e Teknologjisë së Informacionit dhe Komunikimit për individët 16-74 vjeç, interneti përdoret nga 87.2 për qind e popullsisë së kësaj grupmoshe, duke shënuar rritje krahasuar me vitin 2024.
Të dhënat e detajuara tregojnë se shqiptarët janë bërë përdorues edhe më intensivë të internetit sie dhe të Tik Tok-ut. Gjatë 2025 numri i përdoruesve të Tik Tok-ut është rritur me 1% sipas INSTAT.
Ndërkohë, nga ata që e përdorin interbetin, 97.3 për qind hyjnë në internet disa herë gjatë ditës, ndërsa 2.3 për qind e përdorin çdo ditë ose pothuajse çdo ditë. Vetëm 0.3 për qind e përdorin internetin të paktën një herë në javë.
Rritja e përdorimit të internetit gjatë 2025-s nënvizon se sjellja dixhitale e qytetarëve po bëhet gjithnjë e më dinamike, pavarësisht kufizimeve administrative ndaj disa platformave. Treguesit e rinj konfirmojnë se përdorimi i rrjeteve sociale, përfshirë platformat e ndaluara, nuk është frenuar, por ka vazhduar të rritet përmes kanaleve alternative të aksesit.
Në mënyrë paradoksale, një vit me masa kufizuese për Tik Tok-un ka prodhuar pikërisht efektin e kundërt: një shoqëri që hyn më shpesh, konsumon më shumë përmbajtje dhe vijon të jetë e lidhur në çdo moment të ditës. /skyweb.al
