Më shumë se një miliard njerëz në mbarë botën vuajnë nga migrena, një sëmundje neurologjike e rëndë që shoqërohet me dhimbje koke intensive, ndjeshmëri të shtuar ndaj dritës dhe zhurmës, si edhe simptoma të tjera paralizuese. Megjithatë, përparimet shkencore po hapin rrugë të reja trajtimi, duke u dhënë shpresë pacientëve.
Megan Daniels, një avokate 35-vjeçare nga Liverpooli, përdor çdo ditë një pajisje neuromoduluese që stimulon nervat e qafës dhe kokës. “Është shumë qetësuese, ndjen sikur valë kalojnë përmes trurit”, shprehet ajo. Kjo pajisje ndihmon në parandalimin e krizave dhe në lehtësimin e simptomave të migrenës vestibulare, e cila shoqërohet edhe me probleme të ekuilibrit.
Një ndër zbulimet më të rëndësishme në trajtimin e migrenës ka qenë identifikimi i molekulave CGRP, të cilat rrisin ndjeshmërinë e nervave gjatë sulmeve. Bllokimi i këtyre molekulave përmes barnave të posaçme ka sjellë përmirësime të ndjeshme për shumë pacientë, duke ulur frekuencën e sulmeve deri në 75% në disa raste. Megjithatë, efekti i tyre nuk është gjithmonë afatgjatë dhe jo të gjithë pacientët përfitojnë lehtësim të plotë.
Në këtë drejtim, studiuesit po zhvillojnë barna të reja që synojnë peptide të tjera, si Pacap dhe orexin, të cilat mund të përdoren si trajtime parandaluese. Këto terapi synojnë jo vetëm ndalimin e sulmeve në zhvillim, por edhe reduktimin e rrezikut të rikthimit të tyre.
Ndërkohë, botoksi – i njohur kryesisht për përdorim estetik – ka treguar efikasitet në reduktimin e migrenës kronike. Edhe pajisjet neuromoduluese dhe elektrodat që stimulojnë nervat e kokës dhe fytyrës po japin rezultate premtuese, veçanërisht për pacientët që nuk reagojnë ndaj trajtimeve tradicionale me barna.
Ekspertët theksojnë se menaxhimi i migrenës kërkon një qasje të integruar, që përfshin kombinimin e barnave, teknologjisë mjekësore, ndryshimeve në stilin e jetesës, terapisë psikologjike dhe kujdesit ndaj dietës dhe aktivitetit fizik. Siç shprehet edhe Megan Daniels: “Asnjë trajtim i vetëm nuk e zgjidh plotësisht migrenën – të gjitha së bashku përbëjnë puzzle-n e shëndetit.” /skyweb.al
