Drejtoria e Përgjithshme e Doganave ka marrë masa emergjente për të garantuar vijimësinë e qarkullimit të mallrave pas bllokimit të lëvizjes në aksin Librazhd–Elbasan dhe anasjelltas. Drejtori i Përgjithshëm i Doganave, Besmir Beja, deklaroi se strukturat doganore reaguan menjëherë për të menaxhuar situatën dhe për të shmangur pengesat në procedurat doganore.
Sipas Doganave, që në momentin e krijimit të situatës është trajtuar me prioritet pezullimi i përkohshëm i lëvizjes së mallrave dhe udhëtarëve, duke orientuar alternativa të reja kalimi përmes pikave kufitare Bllatë në Dibër për mallrat që hyjnë nga Maqedonia e Veriut dhe Kakavijë për mallrat që hyjnë nga Greqia.
Për të përballuar fluksin e shtuar, janë përforcuar kapacitetet logjistike dhe është shtuar personeli në degët kufitare Bllatë dhe Kakavijë, me synimin përshpejtimin e procedurave deri në normalizimin e situatës rrugore.
Në bashkëpunim me autoritetet e Maqedonisë së Veriut është arritur mirëkuptim për lehtësimin e qarkullimit në pikën e Bllatës, ku kamionët dhe trajlerat e ngarkuar do të kalojnë nga ora 12:00 deri në 22:00, ndërsa mjetet pa ngarkesë do të kenë kalim 24 orë. Po ashtu është garantuar kalimi i produkteve agro që kërkojnë certifikim.
Doganat shqiptare kanë nisur gjithashtu kontakte me autoritetet kosovare për të mundësuar lehtësime të tjera në hyrje dhe dalje të mallrave.
Për mallrat që kanë hyrë në territorin doganor përmes Qafë-Thanës dhe ndodhen në aksin e bllokuar, është ofruar si zgjidhje përdorimi i regjimit të Transitit të Jashtëm T1, i cili lejon tranzitimin nga një pikë doganore në një tjetër. Operatorët duhet të depozitojnë deklaratën T1 në degën doganore Qafë-Thanë me destinacion Bllatën dhe të hartojnë dokumentin e transportit për itinerarin e ri.
Drejtoria e Përgjithshme e Doganave pranon se situata sjell kosto shtesë për bizneset dhe ndikim në proceset e import-eksportit, por thekson se të gjitha strukturat janë angazhuar për të minimizuar pasojat dhe për të garantuar funksionimin normal të aktivitetit tregtar. Dogana njofton se do të vijojë të informojë në kohë reale për çdo zhvillim të mëtejshëm. /skyweb.al
