Një avion Airbus A320-200, i kompanisë ajrore British Airways (avioni në foto), i nisur mëngjesin e sotëm nga Londra drejt Tiranës, është detyruar të ndërpresë fluturimin dhe të kthehet në aeroportin e nisjes për shkak të një defekti teknik.
Problemi është shfaqur pak minuta pas ngritjes në ajër, ndërsa avioni po udhëtonte drejt kryeqytetit shqiptar.
Situata ka shkaktuar momente paniku dhe frike mes dhjetëra pasagjerëve shqiptarë dhe shtetasve të huaj që ndodheshin në bord.
Sipas informacioneve të raportuara, stafi i avionit ka njoftuar pasagjerët se ishte konstatuar një defekt teknik dhe se, për arsye sigurie, fluturimi drejt Tiranës nuk mund të vazhdonte.
Për këtë arsye, ekuipazhi ka marrë vendimin për t’u kthyer në aeroportin Heathrow të Londrës, nga ku avioni ishte nisur.
Pasagjerët kanë përjetuar minuta ankthi gjatë kthimit, ndërsa janë detyruar të ndërpresin udhëtimin e tyre drejt Shqipërisë.
Ende nuk ka informacione të detajuara mbi natyrën e defektit që detyroi avionin të kthehej në Londër.
Siç mëson Skyweb.al, pasagjerët fluturuan qetësisht me një avion tjetër drejt Tiranës. /skyweb.al
