Një valë sulmesh kibernetike ka goditur sistemet e frigoriferëve dhe ngrirësve në disa supermarkete europiane, duke shkaktuar dëme të konsiderueshme ekonomike dhe humbjen e sasive të mëdha të produkteve ushqimore.
Sulmet janë raportuar në Suedi, Belgjikë, Luksemburg dhe Estoni, ndërsa probleme të ngjashme janë konstatuar edhe në Irlandë. Hakerat dyshohet se kanë ndërhyrë në sistemet elektronike të kontrollit të temperaturës, duke rritur atë në nivele shumë të larta dhe duke bërë të papërdorshme produktet e freskëta dhe ato të ngrira.
Sulmi ka prekur rreth 40 dyqane të rrjetit Delhaize në Belgjikë dhe Luksemburg, disa filiale të ICA dhe Coop në Suedi, si dhe 13 dyqane të zinxhirit SuperValu në Irlandë. Në Belgjikë, një prej filialeve të Delhaize ka raportuar humbje produktesh me vlerë rreth 100 mijë euro, ndërsa Carrefour konfirmoi se 15 dyqane të tij ishin prekur.
Në Suedi, në një prej dyqaneve të rrjetit ICA, në qytetin Sjöbo, temperatura e frigoriferëve dhe ngrirësve arriti deri në 50 gradë Celsius. Për të shmangur rrezikun për konsumatorët, produktet që nuk garantonin më sigurinë ushqimore u hoqën nga shitja.
Autoritetet e sigurisë kibernetike në vendet e prekura kanë nisur monitorimin e situatës, ndërsa ende nuk dihet se kush qëndron pas sulmeve.
Ky incident vjen vetëm pak javë pas një sulmi të ngjashëm në Francë, ku u prekën qindra supermarkete. Hakerat arritën të merrnin kontrollin e sistemeve të ftohjes, duke rritur temperaturat e frigoriferëve dhe ngrirësve deri në 50 gradë Celsius. Si pasojë, dyqanet u detyruan të hidhnin sasi të mëdha mishi, bulmeti dhe produkteve të ngrira.
Humbjet në Francë vlerësohet se mund të arrijnë në dhjetëra miliona euro. Ngjarjet kanë ngritur shqetësime për cenueshmërinë e pajisjeve të lidhura me internetin dhe rreziqet që sulmet kibernetike mund të paraqesin edhe për zinxhirin e furnizimit ushqimor.
