Qeveria parashikon të zgjerojë mbështetjen financiare për pensionistët gjatë vitit 2027, përmes dyfishimit të bonusit dhe ndryshimit të periudhës së indeksimit të pensioneve.
Masat u prezantuan nga ministri i Financave, Petrit Malaj, gjatë shqyrtimit të projektbuxhetit të vitit 2027 në Komisionin e Ligjeve, ku mbështetja për moshën e tretë u rendit ndër prioritetet kryesore të politikave sociale.
Sipas ministrit, duke nisur nga 1 janari 2027, do të zbatohet dyfishimi i bonusit për pensionistët, një masë që parashikohet t’i kushtojë buxhetit të shtetit rreth 20 miliardë lekë në vit.
Ndryshime pritet të ketë edhe në kalendarin e indeksimit të pensioneve. Qeveria synon ta afrojë këtë proces në muajin prill, në vend të korrikut, duke vënë në dispozicion një fond shtesë prej 1.35 miliardë lekësh.
Malaj deklaroi se politikat e mbështetjes së pensionistëve për vitin e ardhshëm do të kërkojnë gjithsej 24 miliardë lekë, ekuivalente me rreth 250 milionë euro.
Ministri e cilësoi rritjen e të ardhurave të pensionistëve si një angazhim që do të vijojë edhe gjatë vitit të ardhshëm, me synimin për të përmirësuar mbështetjen ekonomike për këtë kategori.
Përveç pensioneve, projektbuxheti përfshin edhe masa të tjera sociale për familjet me fëmijë dhe qytetarët që kanë nevojë për strehim.
Një prej tyre është vijimi i skemës së kompensimit përmes Deklaratës Individuale Vjetore të të Ardhurave (DIVA), e cila mundëson zbritjen e shpenzimeve në vlerën 48 mijë lekë për qytetarët me fëmijë nën moshën 18 vjeç.
Për programet e strehimit social është parashikuar një fond prej 3 miliardë lekësh, i cili do të përdoret për mbështetjen e familjeve që kanë vështirësi në sigurimin e banesave.
Mbështetja do të vijojë edhe për sektorin bujqësor, ku qeveria ka planifikuar 3 miliardë lekë për skemën e kompensimit të TVSH-së për fermerët gjatë vitit 2027.
Një tjetër drejtim i rëndësishëm i projektbuxhetit janë investimet publike, të cilat parashikohen në nivelin 6.6% të Prodhimit të Brendshëm Bruto.
Sipas ministrit të Financave, investimet do të përqendrohen kryesisht në rrugë dhe projekte infrastrukturore, me një portofol projektesh që tejkalon vlerën 2 miliardë euro.
Ndërkohë, për arsimin parashikohet një fond prej 93.7 miliardë lekësh, duke shënuar rritje krahasuar me vitin e mëparshëm.
Nga ky financim, 1.1 miliardë lekë do të përdoren për rritjen e bursave të studentëve, ndërsa 400 milionë lekë janë planifikuar për përmirësimin e infrastrukturës bazë arsimore.
Gjithashtu, 500 milionë lekë do të shkojnë për programin pas shkolle dhe 100 milionë lekë për mbështetjen e kërkimit shkencor.
Sipas Malajt, projektbuxheti i vitit 2027 synon të ndërthurë rritjen e mbështetjes sociale me financimin e investimeve publike, arsimit dhe sektorëve që ndikojnë në zhvillimin ekonomik të vendit. /skyweb.al
