Kontrolli i Lartë i Shtetit ka evidentuar problematika financiare me vlerë rreth 196 milionë lekë në Bashkinë Dibër (rreth 2 mln euro), ndërkohë që institucioni vendor nuk ka respektuar afatet ligjore për të raportuar mbi zbatimin e rekomandimeve të auditimit.
Gjetjet janë pasqyruar në raportin përfundimtar të auditimit financiar, ku KLSH ka analizuar edhe masat e ndërmarra nga Bashkia për shkeljet e konstatuara në kontrollet e mëparshme.
Sipas dokumentit të konsultuar nga Skyweb.al, auditimi i mëparshëm, që mbulonte periudhën 2023–2024, kishte evidentuar 94,374,651 lekë të ardhura të munguara për buxhetin vendor.
Krahas tyre, KLSH kishte konstatuar edhe 101,618,041 lekë efekte negative financiare në administrimin e fondeve publike, për të cilat kishte rekomanduar marrjen e masave për eliminimin e tyre.
Në total, bëhet fjalë për 195,992,692 lekë problematika financiare të evidentuara nga audituesit e shtetit.
Përveç masave financiare, KLSH kishte rekomanduar 44 masa organizative dhe 13 masa disiplinore, të cilat ishin pranuar nga Bashkia Dibër.
Por ajo që bie në sy në raportin e ri është mungesa e raportimit të Bashkisë për zbatimin e rekomandimeve të lëna.
Raporti i mëparshëm ishte dërguar zyrtarisht më 2 dhjetor 2025, ndërsa legjislacioni detyron subjektet e audituara të informojnë KLSH-në brenda 20 ditëve mbi planin e masave që do të ndërmarrin.
Nga verifikimi i dokumentacionit, audituesit kanë konstatuar se Bashkia Dibër nuk kishte kthyer përgjigje brenda këtij afati.
Situata është përsëritur edhe me detyrimin tjetër ligjor, sipas të cilit institucioni duhet të raportojë brenda gjashtë muajve mbi ecurinë e zbatimit të rekomandimeve.
Edhe pas përfundimit të këtij afati, KLSH konstaton se Bashkia Dibër nuk kishte kthyer përgjigje.
Problematika nuk kufizohet vetëm te komunikimi me institucionin më të lartë të auditimit.
Sipas raportit, Bashkia kishte hartuar një plan veprimi për rekomandimet, por nuk kishte raportuar rregullisht as përpara Këshillit Bashkiak mbi ecurinë e zbatimit të tyre.
Ky është një detyrim i përcaktuar shprehimisht në nenin 50 të ligjit për financat e vetëqeverisjes vendore, i cili ngarkon kryetarin e Bashkisë me përgjegjësinë për përgatitjen e planit të veprimit dhe raportimin e rregullt në Këshill.
Gjetjet marrin rëndësi të veçantë për shkak se bëhet fjalë për të ardhura të munguara dhe efekte negative në menaxhimin e fondeve publike, për të cilat institucioni duhej të dokumentonte masat korrigjuese.
Madje, në kontrollin e rekomandimeve të mëparshme, KLSH ka konstatuar se për ngritjen e një sistemi efektiv të menaxhimit financiar dhe kontrollit të brendshëm, Bashkia nuk kishte marrë asnjë masë.
Në raportin e ri, Kontrolli i Lartë i Shtetit ka dhënë gjithashtu opinion të kualifikuar për pasqyrat financiare të vitit 2025, për shkak të gabimeve materiale dhe mangësive të konstatuara në raportimin e pasurive dhe detyrimeve financiare.
Kështu, krahas problemeve të trashëguara në administrimin e fondeve publike, Bashkia Dibër rezulton me shkelje të detyrimeve për llogaridhënie ndaj KLSH-së dhe raportim të rregullt përpara Këshillit Bashkiak. /skyweb.al
