Një ngjarje e rëndë raportohet të ketë ndodhur brenda ambienteve të Inspektoriatit Kombëtar të Mbrojtjes së Territorit, ku drejtuesi Fatmir Meta dyshohet se është goditur fizikisht në zyrën e tij pas një konflikti lidhur me një bllokim aktiviteti në zonën e Tiranës.
Sipas burimeve, autor i dyshuar është Klesti Çela, kunati i Ergys Agasit, i cili mbulonte sektorin e mjedisit në IKMT. Sëbashku me tre persona të tjerë, kanë hyrë në zyrë dhe e kanë goditur Metën me qytë pistolete pas një debati që lidhej me bllokimin e disa mjeteve që po derdhnin dhera në mënyrë të paligjshme në periferi të kryeqytetit.
Burimet thonë se mjetet ishin ndaluar në përputhje me ligjin, pasi po kryenin aktivitet pa leje.
Pikërisht ky bllokim dyshohet se ka sjellë përplasjen brenda institucionit.
Pyetja që mbetet pezull është se kujt ndërtuesi i përkiste dhera dhe pse ndërhyrja për zhbllokimin e tyre degjeneroi në dhunë fizike ndaj një zyrtari shtetëror.
Veprimet për bllokimin e kamionëve të paligjshëm me dhera janë kryer me urdhër të kreut të IKMT Afrim Qendro, megjithatë deri në këto momente nuk ka një reagim zyrtar nga IKMT apo nga personat e përmendur.
Ngjarja, nëse konfirmohet, ngre pikëpyetje serioze mbi sigurinë brenda institucioneve dhe mbi presionet që mund të ushtrohen në rastet e kontrolleve ndaj shkeljeve mjedisore.
Ndërkohë, emri i Ergys Agasit figuron në dosjen hetimore të SPAK lidhur me çështjen e AKSHI-t dhe prokurimet publike, ku ndaj tij janë raportuar masa sigurie në kuadër të hetimit, përfshirë masë arresti. /skyweb.al
