Një në katër turistë që zgjedhin Shqipërinë vijnë nga Italia, duke e bërë këtë shtet burimin kryesor të vizitorëve të huaj në vend.
Të dhënat për muajin janar 2026 tregojnë se 25 për qind e të huajve që u akomoduan në strukturat turistike në Shqipëri janë italianë, një peshë që konfirmon lidhjet e forta turistike mes dy vendeve dhe praninë e qëndrueshme të këtij tregu.
Pas Italisë renditet Kosova me 14 për qind të vizitorëve, ndërsa Gjermania zë 6 për qind. Vizitorët nga Mbretëria e Bashkuar dhe Franca përbëjnë respektivisht 5 dhe 4 për qind, ndërsa 46 për qind e turistëve vijnë nga vende të tjera.
Në total, numri i vizitorëve që u akomoduan në Shqipëri gjatë janarit u rrit me 15.1 për qind krahasuar me të njëjtin muaj të një viti më parë. Rritja është mbështetur si nga turistët rezidentë me 16.8 për qind, ashtu edhe nga ata jo-rezidentë me 13.8 për qind.
Edhe net-qëndrimet shënuan rritje me 9 për qind në total. Vizitorët rezidentë rritën net-qëndrimet me 16.4 për qind, ndërsa të huajt me 4.3 për qind.
Paralelisht, norma e shfrytëzimit të dhomave në hotele arriti në 15.4 për qind, nga 14.5 për qind që ishte në janar 2025, duke reflektuar një aktivitet më të lartë të sektorit turistik edhe në sezonin e dimrit.
