Potenciali turistik i Durrës po prezantohet në ITB Berlin 2026, ku Shqipëria paraqitet si një destinacion autentik mesdhetar me oferta të larmishme.
Kryeministri Edi Rama publikoi pamjet promovuese të qytetit bregdetar, duke e cilësuar Durrësin si më shumë se një destinacion plazhi – një qytet me histori të pasur dhe traditë mikpritjeje. “Durrësi vjen përpara botës si një destinacion që bashkon detin, kulturën dhe zhvillimin”, theksoi Rama.
I njohur si një nga pikat më të frekuentuara nga turistët vendas dhe të huaj, Durrësi ofron një gamë të gjerë atraksionesh përtej vijës bregdetare. Trashëgimia kulturore dhe historike përbën një nga asetet kryesore të qytetit, me monumente simbolike si Torra Veneciane e Durrësit, Mozaiku i Bukuroshes së Durrësit, Amfiteatri i Durrësit dhe Muzeu Arkeologjik i Durrësit.
Në këtë edicion të panairit, Shqipëria prezantohet me një agjendë që ndërthur inovacionin me kulturën, natyrën dhe eksperiencat autentike lokale. Me një territor relativisht të vogël, por me diversitet të theksuar natyror dhe kulturor, vendi synon të pozicionohet si një destinacion i turizmit të qëndrueshëm.
