Tatimpaguesit që kanë marrë njoftim nga Administrata Tatimore se nuk plotësojnë kushtet për të përfituar nga Ligji për Faljen e Detyrimeve mund të kërkojnë rishikimin e vendimit.
Administrata Tatimore bën të ditur se çdo subjekt ka të drejtë të paraqesë kërkesë ose ankesë pranë Drejtorisë Rajonale Tatimore përkatëse, duke e shoqëruar atë me dokumentacionin provues sipas rastit.
Sipas sqarimit zyrtar, të gjitha kërkesat do të shqyrtohen nga administrata. Nëse gjatë verifikimit konstatohet se tatimpaguesi i plotëson kushtet e përcaktuara në ligj, do të merren masat për të reflektuar përfitimet që parashikon Ligji për faljen ose shuarjen e detyrimeve tatimore të papaguara.
Për rastet që lidhen me procedime penale në fushën tatimore ose doganore, kërkesa duhet të shoqërohet me dokumente si vërtetim i gjendjes gjyqësore, vërtetim nga prokuroria, gjykata ose dokumente të tjera zyrtare. Ndërsa kur përjashtimi lidhet me një vendim gjyqësor të formës së prerë në favor të administratës tatimore, duhet të paraqiten dokumentet përkatëse që provojnë të kundërtën, nëse ekzistojnë.
Administrata Tatimore ka bërë me dije gjithashtu se në të njëjtën procedurë mund të paraqiten edhe kërkesat për heqje dorë nga e drejta e padisë ose ankimit, në përputhje me parashikimet e ligjit.
