Operatorët e transportit publik urban nuk do të jenë të detyruar të pajisen me terminale POS/POI për pranimin e pagesave elektronike.
Sqarimi është dhënë nga Ministria e Financave, pas kërkesës së Shoqatës Kombëtare të Transportit Qytetas për interpretimin e legjislacionit në fuqi.
Sipas Ministrisë, ligji parashikon që subjektet e përjashtuara nga detyrimi për lëshimin e faturës janë njëkohësisht të përjashtuara edhe nga detyrimi për instalimin e terminaleve POS/POI.
Në këtë kategori përfshihet edhe shitja e biletave ose kuponave nga drejtuesit e mjeteve të transportit publik urban.
Në argumentimin e saj, Ministria thekson se operatorët e autobusëve urbanë fiskalizojnë shërbimin përmes biletave dhe aboneve që u lëshohen pasagjerëve.
Për këtë arsye, ata nuk kanë detyrim të vendosin terminale pagesash elektronike në autobusë.
Sqarimi vjen pas debatit të krijuar javët e fundit, kur Shoqata Kombëtare e Transportit Qytetas kundërshtoi vendosjen e detyrueshme të POS-eve, duke argumentuar se instalimi i tyre në çdo autobus do të sillte kosto shtesë dhe probleme teknike, me rrezikun që këto kosto të reflektoheshin edhe në tarifën e biletës.
Detyrimi për përdorimin e terminaleve POS është pjesë e masave të administratës tatimore për të zgjeruar përdorimin e pagesave elektronike dhe për të reduktuar transaksionet me para në dorë, por Ministria e Financave sqaron se ky detyrim nuk zbatohet për transportin publik urban.
