Një individ që jeton i vetëm në Tiranë dhe paguhet me pagën mesatare neto mujore prej rreth 760 eurosh nuk arrin të mbulojë shpenzimet bazë të jetesës.
Sipas një raporti të Tradingpedia, të cilit i referohet Monitor, një personi të vetëm në kryeqytetin shqiptar i duhen rreth 853 euro në muaj për të përballuar qiranë, ushqimet, transportin, kujdesin personal dhe shpenzimet e tjera të zakonshme.
Kjo do të thotë se kostoja mujore e jetesës në Tiranë arrin në 112.2% të pagës mesatare neto.
Ky është niveli i dytë më i lartë në Europë, pas Lisbonës, ku shpenzimet mujore për një individ arrijnë në 121.4% të pagës mesatare.
Tirana dhe Lisbona janë dy kryeqytetet e vetme europiane ku paga mesatare mujore nuk mjafton për të mbuluar jetesën normale të një personi të vetëm.
Barra kryesore për individët në Tiranë mbetet qiraja.
Sipas të dhënave të tregut imobiliar, qiraja mesatare e apartamenteve në kryeqytet ka arritur në rreth 721 euro në muaj.
Kjo shumë përthith pothuajse të gjithë pagën mesatare neto të një individi.
Në praktikë, një person me pagë mesatare që jeton i vetëm në Tiranë duhet të heqë dorë nga disa shpenzime, të ndajë qiranë me dikë tjetër, të jetojë me familjen ose të marrë borxh për të mbyllur muajin.
Sipas standardeve ndërkombëtare, qiraja konsiderohet e përballueshme kur nuk kalon 30% të të ardhurave mujore.
Në Tiranë, ky tregues është disa herë më i lartë, duke e bërë strehimin praktikisht të papërballueshëm për një individ me të ardhura mesatare.
Raporti tregon se kostoja e jetesës për një individ në Tiranë është më e lartë se në disa kryeqytete të rajonit.
Në Maqedoninë e Veriut, një personi i duhen 702 euro në muaj për të jetuar normalisht, ndërsa paga mesatare neto është 769 euro.
Në Podgoricë, shpenzimet mujore llogariten në 759 euro, përballë një page mesatare neto prej 1,013 eurosh.
Në Bosnjë-Hercegovinë, kostoja mujore për një individ është 584 euro, ndërsa paga mesatare neto arrin në 883 euro.
Të dhënat tregojnë se Tirana është bërë një nga kryeqytetet më të vështira në Europë për të jetuar vetëm me pagë mesatare.
