Projektet nuk do të mund të kategorizohen si “resorte mikse” duke pasur si funksion të vetëm ndërtimin e apartamenteve dhe vilave për banim. Qeveria ka përcaktuar se të paktën 60% e sipërfaqes totale të ndërtimit në këto zhvillime duhet t’i shërbejë turizmit, ndërsa pjesa rezidenciale nuk mund të kalojë 40%.
Vendimi i fundit vendos një kufi të matshëm mes funksionit turistik dhe atij të banimit brenda të njëjtit projekt, duke kufizuar përdorimin e emërtimit “resort” për zhvillime të dominuara nga rezidencat.
Në komponentin turistik do të përfshihen struktura akomoduese dhe sipërfaqet e destinuara ekskluzivisht për shërbime turistike. Apartamentet, vilat apo pjesët e ndërtesave të projektuara për banim do të llogariten në komponentin rezidencial.
Raporti 60% me 40% do të përllogaritet mbi sipërfaqen totale të ndërtimit, jo mbi sipërfaqen e truallit. Për shembull, në një zhvillim me 10 mijë metra katrorë ndërtim, të paktën 6 mijë duhet të jenë për funksione turistike dhe jo më shumë se 4 mijë për banim.
Në llogaritje do të futen edhe ambientet dhe infrastruktura e përbashkët. Kur ato u shërbejnë të dyja pjesëve, sipërfaqet do të ndahen proporcionalisht. Vendimi përcakton se asnjë sipërfaqe ndërtimi nuk mund të përjashtohet nga përllogaritja.
Zhvilluesi dhe projektuesi përgjegjës duhet të nënshkruajnë tabelën që identifikon sipërfaqet për çdo objekt, kat dhe funksion. Edhe kur një ambient emërtohet ndryshe në projekt, ai do t’i ngarkohet komponentit të cilit i shërben kryesisht.
Përpara miratimit të lejes së ndërtimit, projekti duhet të marrë certifikatën paraprake të kategorizimit nga ministria përgjegjëse për turizmin. Ndryshimet e mëvonshme që prekin ndarjen turistike dhe rezidenciale ose raportin e sipërfaqeve kërkojnë ndryshimin paraprak të certifikatës dhe, sipas rastit, të lejes së ndërtimit.
Apartamentet dhe vilat e destinuara për turistë do të jenë pjesë e administrimit të përbashkët të resortit. Njësitë e projektuara për banim mund të kalojnë në përdorim turistik vetëm pas përmbushjes së procedurave përkatëse. /skyweb.al
