Zyrtarët që nuk inventarizojnë pasurinë dhe detyrimet e institucioneve publike, kryejnë regjistrime pa dokumentacion apo nuk përmbushin detyrimet për bilancet financiare mund të përballen me gjoba nga një deri në tri paga mujore.
Masa parashikohet në projektligjin “Për kontabilitetin në sektorin publik”, të miratuar sëfundmi nga qeveria.
Neni 27 përcakton përgjegjësi personale për nëpunësit dhe punonjësit që kanë detyra në menaxhimin, regjistrimin dhe raportimin financiar të institucioneve.
Gjobat propozohen për tri kategori shkeljesh: moskryerjen e inventarizimit të aktiveve dhe detyrimeve, regjistrimet kontabël pa dokumentacion justifikues dhe mospërmbushjen e detyrimeve për përgatitjen, miratimin e dorëzimin e pasqyrave financiare.
Përgjegjësia do të përcaktohet sipas funksionit që ka secili punonjës. Ajo mund të përfshijë nëpunësin autorizues, nëpunësin zbatues ose personin e ngarkuar me inventarizimin.
Masa e gjobës do të llogaritet mbi pagën mujore të personit përgjegjës. Për përcaktimin e saj do të merren parasysh rëndësia e shkeljes, niveli i përgjegjësisë, përsëritja dhe pasojat e shkaktuara.
Projektligji kërkon që institucionet të mbajnë regjistra të plotë dhe të saktë të pasurisë dhe detyrimeve, si dhe të kryejnë inventarizim të paktën një herë në vit.
Të dhënat duhet të rakordohen me kontabilitetin, regjistrat publikë dhe dokumentet që vërtetojnë pronësinë, administrimin ose kontrollin mbi pasurinë. Diferencat e konstatuara duhet të analizohen, dokumentohen dhe pasqyrohen në regjistrat përkatës.
Shkeljet e listuara do të trajtohen si kundërvajtje administrative kur nuk përbëjnë vepër penale. Kur konstatohen rrethana që mund të përbëjnë vepër penale, ato do t’u referohen organeve kompetente. /skyweb.al
