Peshkimi në liqenin e Ohrit do të ndalohet nga 1 dhjetori 2026 deri më 1 mars 2027, ndërsa për belushkën ndalimi është përcaktuar që prej 1 nëntorit.
Masa përsërit ndalimin sezonal të zbatuar edhe në vitet e mëparshme, gjatë periudhës së riprodhimit të peshqve.
Për belushkën ndalohet peshkimi me çdo mjet dhe metodë, si edhe mbajtja në bord, transportimi në barkë dhe zbarkimi i qëllimtë i saj deri më 1 mars 2027.
Nga 1 dhjetori, këto kufizime shtrihen për të gjitha llojet e peshqve në liqen, përfshirë koranin.
Përjashtim bëhet për cironkën, e cila mund të peshkohet me trata të zallit, të njohura si “vlagë”, vetëm në zonat bregliqenore të përcaktuara nga Drejtoria e Shërbimeve të Peshkimit dhe Akuakulturës.
Urdhri parashikon sekuestrimin e mjeteve të peshkimit të kapura nga strukturat e kontrollit gjatë periudhës së ndalimit.
Një përjashtim tjetër lidhet me kapjen e koranit riprodhues për grumbullimin e vezëve, të cilat do të inkubohen në Qendrën e Prodhimit të Rasateve në Lin të Pogradecit.
Për këtë program parashikohet grumbullimi deri në 220 kilogramë vezë korani dhe bashkëpunimi me 60 peshkatarë me përvojë, përmes kontratave përkatëse.
Shpenzimet për vezët, karburantin, transportin dhe veprimtarinë do të mbulohen nga buxheti i planifikuar i Drejtorisë.
Në pikën për këtë program, dokumenti shënon periudhën 1 janar 2026–1 mars 2027, duke lënë një paqartësi te viti i fillimit. Ndërkohë, afatet e ndalimit për belushkën dhe për peshkimin e përgjithshëm janë përcaktuar për sezonin dimëror 2026–2027.
Për zbatimin e urdhrit ngarkohen strukturat e peshkimit, autoritetet vendore në Pogradec, Policia, Policia Tatimore dhe AKU-ja e Korçës.
