Kompanitë që transportojnë mallra të rrezikshme pa respektuar kushtet e sigurisë do të përballen me gjoba deri në 1 milion lekë dhe bllokim të mjeteve.
Masat parashikohen në projektligjin e ri “Për transportin e mallrave të rrezikshme”, të propozuar nga qeveria për miratim në Kuvend.
Projektligji zbatohet për transportin rrugor dhe hekurudhor brenda Shqipërisë, por edhe për mallrat që hyjnë, dalin ose kalojnë transit në territorin e vendit. Gjoba nga 750 mijë deri në 1 milion lekë parashikohen për transportimin pa autorizim të lëndëve plasëse, materialeve radioaktive ose bërthamore.
Të njëjtat masa mund të zbatohen edhe kur kompanitë përdorin mjete, cisterna, kontejnerë apo ambalazhe të dëmtuara dhe të pasigurta. Projektligji i jep Policisë Rrugore kompetenca më të mëdha për ndërhyrjen gjatë kontrolleve në rrugë.
Kur konstatohet një shkelje që rrezikon njerëzit, pronën ose mjedisin, policia mund të urdhërojë ndërprerjen e menjëhershme të transportit.
Mjeti mund të bllokohet dhe të mbahet në një vend të sigurt derisa të eliminohet rreziku. Autoritetet mund të urdhërojnë gjithashtu shkarkimin ose transferimin e ngarkesës në një automjet tjetër.
Në rast rrjedhjeje apo ndotjeje, mund të kërkohet pastrimi dhe dekontaminimi i mjetit, cisternës ose zonës së prekur. Shpenzimet për këto masa do të përballohen nga subjekti përgjegjës për transportin.
Rregulla të posaçme parashikohen edhe për kamionët e regjistruar jashtë Shqipërisë. Atyre mund t’u ndalohet dalja nga territori shqiptar deri në shlyerjen e gjobës.
Në vend të pagesës së menjëhershme, transportuesit të huaj mund t’i kërkohet depozitimi i një garancie financiare. Projektligji përcakton përgjegjësi jo vetëm për transportuesin, por edhe për dërguesin, ngarkuesin, shkarkuesin dhe operatorin e cisternës.
Dokumentet, certifikatat, autorizimet, etiketat dhe pajisjet e sigurisë do të kontrollohen nga Policia Rrugore dhe institucionet e tjera përgjegjëse.
Qëllimi është parandalimi i aksidenteve, rrjedhjeve dhe incidenteve që mund të rrezikojnë jetën, shëndetin dhe mjedisin. Kuadri i ri do të zëvendësojë ligjin e vitit 2012 dhe synon përafrimin e rregullave shqiptare me standardet e Bashkimit Evropian për transportin e mallrave të rrezikshme. /skyweb.al
