“Pacienti zero” i shpërthimit të hantavirusit në një anije turistike dyshohet të ketë qenë ornitologu Leo Schilperoord, pasioni i të cilit për vëzhgimin e shpendëve mund t’i ketë kushtuar jetën.
70-vjeçari dhe bashkëshortja e tij, Mirjam Schilperoord, 69 vjeçe, kishin kaluar pesë muaj duke udhëtuar në Amerikën e Jugut. Çifti mbërriti në Argjentinë më 27 nëntor dhe më pas vizitoi Kilin dhe Uruguain, për t’u rikthyer në Argjentinë në fund të marsit, ku morën pjesë në një ekskursion për vëzhgimin e shpendëve që rezultoi fatal.
Me origjinë nga Haulerwijk, një fshat i vogël në Holandë, identiteti i tyre u konfirmua përmes njoftimeve mortore të publikuara në buletinin lokal të zonës.
Sipas autoriteteve argjentinase, çifti mund të jetë infektuar në një landfill në Ushuaia, pasi dyshohet se kanë thithur grimca të kontaminuara nga jashtëqitjet e minjve “miu i vogël i orizit” me bisht të gjatë, bartës të hantavirusit — varianti i vetëm i njohur deri tani që mund të transmetohet nga njeriu te njeriu.
Më 1 prill, çifti hipi në anijen turistike MV Hondius nga Ushuaia, së bashku me 112 pasagjerë të tjerë, shumica prej tyre të apasionuar pas shpendëve ose studiues shkencorë.
Më 6 prill, Leo Schilperoord shfaqi simptoma si temperaturë, dhimbje koke, dhimbje barku dhe diarre. Pesë ditë më vonë ai ndërroi jetë në bordin e anijes.
Më 24 prill, Mirjam zbriti nga anija në ishullin Saint Helena, duke transportuar edhe trupin e pajetë të bashkëshortit gjatë një ndalese të planifikuar. Ajo udhëtoi drejt Johannesburg dhe më pas hipi në një fluturim të kompanisë KLM për në Holandë, por nuk arriti kurrë në destinacion.
Sipas raportimeve, gjendja e saj ishte përkeqësuar aq shumë sa ekuipazhi e konsideroi të papërshtatshme për të vazhduar udhëtimin dhe e zbriti nga avioni. Mirjam u rrëzua në aeroport dhe ndërroi jetë një ditë më vonë. /skyweb.al
