Kompanitë ajrore pritet të kursejnë miliarda dollarë nga ulja e çmimit të karburantit të avionëve, pas marrëveshjes së përkohshme të paqes mes SHBA-së dhe Iranit që uli çmimet e naftës në tregjet ndërkombëtare.
Megjithatë, pasagjerët nuk pritet të përfitojnë menjëherë bileta më të lira.
Sipas Reuters, arsyeja kryesore lidhet me kapacitetet e kufizuara në tregun ajror dhe me faktin se kompanitë ajrore pritet ta përdorin uljen e kostove për të rindërtuar marzhet e fitimit, jo për të ulur menjëherë çmimet e biletave.
Rasti më i qartë është tregu amerikan. Edhe pse kompanitë kanë rritur çmimet e biletave dhe tarifat për bagazhet gjatë muajve të fundit, këto rritje nuk kanë mbuluar plotësisht shtrenjtimin e karburantit.
Të dhënat tregojnë se çmimi i karburantit të avionëve u rrit mbi tre herë më shpejt se çmimet e biletave gjatë periudhës janar-maj.
Sipas Deutsche Bank, kompanitë ajrore amerikane kanë arritur të rikuperojnë vetëm rreth 60 cent për çdo dollar shtesë të shpenzuar për karburant. Konkretisht, ato kanë siguruar rreth 14.4 miliardë dollarë të ardhura shtesë, përballë 24.1 miliardë dollarëve kosto shtesë për karburant.
Çmimi spot i karburantit të avionëve në SHBA ishte 2.85 dollarë për gallon më 17 qershor, nga 4.88 dollarë që kishte arritur në fillim të prillit.
Nëse kjo rënie do të qëndronte, fatura vjetore e karburantit për industrinë ajrore amerikane do të ulej me më shumë se 40 miliardë dollarë.
Por kjo nuk do të thotë automatikisht bileta më të lira për udhëtarët.
Disa kompani të mëdha ajrore kanë deklaruar se ende nuk kanë arritur të kompensojnë plotësisht rritjen e mëparshme të kostove. Alaska Air ka thënë se ka rikuperuar vetëm rreth një të tretën e rritjes së çmimit të karburantit, ndërsa Delta, United dhe American Airlines vlerësojnë se kanë rikuperuar 40% deri në 50% të kostove shtesë në tremujorin e dytë.
JetBlue dhe Frontier presin të rikuperojnë më pak se gjysmën.
Drejtori ekzekutiv i United Airlines, Scott Kirby, tha për Reuters se kompania po i afrohet rikuperimit të plotë të rritjes së kostove përmes çmimeve të biletave.
“Jemi në rrugën për të rikuperuar 100% deri në fund të vitit”, tha ai.
Ndërkohë, të dhënat e Raymond James tregojnë se çmimet mesatare të biletave për fluturimet e brendshme në SHBA, të rezervuara një javë para udhëtimit, ishin 34.1% më të larta se një vit më parë deri më 8 qershor.
Pyetja kryesore tani është nëse kompanitë ajrore do të arrijnë t’i mbajnë çmimet e rritura edhe pse karburanti po bëhet më i lirë.
Analistët vlerësojnë se kapacitetet e kufizuara dhe kërkesa e qëndrueshme për udhëtime mund t’u japin kompanive hapësirë për të shmangur një “luftë çmimesh” dhe për të mos ulur menjëherë tarifat.
Në këtë skenar, ulja e naftës do të ndihmojë më shumë bilancet e kompanive ajrore sesa xhepat e pasagjerëve, të paktën në afat të shkurtër.
