Pas dështimit të projektit korruptiv të inceneratorëve, kriza e menaxhimit të mbetjeve në Elbasan është thelluar ndjeshëm. Bashkia e qytetit nuk ka fonde për të ndërtuar një landfill të ri dhe i është drejtuar qeverisë për mbështetje financiare.
Administratori i kompanisë publike “Eco-Elb”, Leli Kaja, gjatë një interpelance në Këshillin Bashkiak më 29 korrik, e cilësoi situatën emergjente, duke theksuar se inceneratori është jashtë funksioni dhe se sasia e mbetjeve ka shembur disa skarpata të landfillit.
Sipas tij, në venddepozitim hyjnë mbi 150 ton mbetje në ditë, duke rrezikuar përsëritjen e incidenteve.
Inceneratori i Elbasanit, më i vogli nga tre impiantet e ndërtuara me skemën PPP dhe që kushtoi 26 milionë euro, ka mbetur prej vitesh me defekt.
Prej vitit 2021, menaxhimi i zonës është marrë nga “Eco-Elb” përmes një kontrate qiraje nga Agjencia e Administrimit të Pasurive të Sekuestruara, por kompania nuk ka arritur ta vërë në punë impiantin.
Kryebashkiaku Gledian Llatja deklaroi se, sipas strategjisë kombëtare, mbetjet duhet të shkojnë në landfill, por bashkia nuk ka kapacitete financiare për ndërtimin e një të riu.
Edhe këshilltarët bashkiakë, të majtë e të djathtë, e shohin si të vetmen zgjidhje ndërtimin ose zgjerimin e venddepozitimit.
Kriza e Elbasanit shihet si një pasojë direkte e kontratave të inceneratorëve, që u kushtuan taksapaguesve mbi 150 milionë euro për impiante me probleme ose të pambyllura. Burimi: BIRN
