Policia e Shtetit ka ngritur alarmin për një skemë mashtrimi që po qarkullon përmes mesazheve telefonike në emër të bankave, me qëllim vjedhjen e të dhënave personale dhe marrjen e parave nga llogaritë e qytetarëve.
Strukturat e Hetimit të Krimit Kibernetik bëjnë të ditur se janë evidentuar raste kur qytetarëve u dërgohen SMS nga numra të ndryshëm telefoni, në të cilat autorët prezantohen si përfaqësues të institucioneve bankare.
Në mesazhe, qytetarëve u kërkohet të verifikojnë identitetin e tyre brenda një afati të shkurtër, zakonisht 24 ose 31 orë, duke i paralajmëruar për kufizime të mundshme të shërbimeve bankare.
Për të kryer këtë proces, ata orientohen të klikojnë në një lidhje elektronike që shfaqet në përmbajtjen e SMS-së.
Por sipas Policisë, këto lidhje nuk u përkasin faqeve zyrtare të bankave. Ato i drejtojnë përdoruesit në faqe të falsifikuara, të krijuara posaçërisht për të vjedhur informacionet e tyre financiare.
Skema njihet si “Smishing”, një formë mashtrimi kibernetik që shfrytëzon mesazhet telefonike për të krijuar besim dhe për t’i nxitur qytetarët të veprojnë me urgjencë.
Pasi hyjnë në faqet e falsifikuara, qytetarëve mund t’u kërkohet të vendosin numrat e kartave bankare, fjalëkalimet e shërbimeve bankare online, PIN-et apo kodet e verifikimit.
Këto të dhëna përdoren më pas nga autorët për të siguruar akses të paautorizuar në llogaritë bankare dhe për të realizuar transaksione financiare, duke përvetësuar paratë e qytetarëve.
Policia paralajmëron se shfaqja e emrit të një banke të njohur në mesazh nuk garanton se komunikimi është dërguar nga vetë institucioni financiar.
Për këtë arsye, qytetarëve u kërkohet të mos klikojnë në lidhje të dyshimta dhe të mos japin të dhënat e kartave, fjalëkalimet apo kodet e sigurisë në faqe të hapura përmes SMS-ve.
Gjithashtu, Policia këshillon që të mos merren parasysh afatet urgjente për verifikimin e identitetit apo paralajmërimet për bllokimin e shërbimeve bankare, pa u konfirmuar më parë informacioni.
Çdo komunikim i dyshimtë duhet të verifikohet drejtpërdrejt me bankën përkatëse, përmes numrave të kontaktit dhe kanaleve zyrtare.
Në rastet kur qytetarët kanë vendosur të dhënat e tyre bankare në një faqe të dyshimtë, duhet të kontaktojnë menjëherë bankën për të kërkuar bllokimin e kartës ose të aksesit në llogari.
Policia u kërkon gjithashtu personave që kanë marrë mesazhe të tilla apo kanë rënë viktimë e mashtrimit të denoncojnë rastet, duke ruajtur SMS-të, numrat e telefonit dhe lidhjet elektronike të përdorura.
Strukturat e Krimit Kibernetik po vijojnë hetimet për identifikimin e autorëve dhe parandalimin e dëmeve financiare.
Autoritetet u bëjnë thirrje qytetarëve të tregojnë kujdes të shtuar, pasi një klikim në një lidhje të falsifikuar dhe dhënia e të dhënave të sigurisë mund t’u kushtojë humbjen e kursimeve bankare.
