Pas një viti të mbushur me superlativa për numrin e turistëve italianë që zgjidhnin Shqipërinë si destinacion pushimesh, muaji qershor i këtij viti shënoi një kthesë të papritur: hyrjet nga Italia ranë me 4 për qind, krahasuar me të njëjtën periudhë të vitit të kaluar. Kjo është hera e parë që vihet re një tendencë rënëse që prej nisjes së “bumit italian” në sezonin turistik shqiptar.
Të dhënat zyrtare tregojnë se në qershor 2025 kanë hyrë rreth 111 mijë italianë, ndërsa në qershorin e vitit të kaluar ky numër ishte rreth 116 mijë. Edhe pse në total për gjashtëmujorin e parë të vitit, hyrjet e italianëve mbeten në rritje me 5 për qind, rënia në pikun e sezonit konsiderohet një sinjal serioz për industrinë e turizmit.
Agjencitë turistike shqiptare kishin paralajmëruar më herët për një rënie të rezervimeve, sidomos në jug të vendit.
Kjo rënie përfshinte edhe turistët italianë, të cilët vitin e kaluar kishin shënuar një rritje rekord prej 57 për qind në të njëjtën periudhë sipas Monitor.
Këtë vit, rritja është ngadalësuar ndjeshëm.
Sipas mediave italiane, si “Corriere della Sera”, një nga arsyet kryesore për këtë kthesë është rritja e çmimeve në Shqipëri, që ka zbehur përparësinë konkurruese të vendit në raportin cilësi/çmim. Agjencitë e udhëtimit në Itali raportojnë se shumë turistë kanë zgjedhur zona si Puglia në vend të bregdetit shqiptar, për shkak të ofertave më të leverdishme dhe shërbimeve më të konsoliduara.
Pavarësisht kësaj, italianët mbeten grupi i dytë më i madh i turistëve në Shqipëri, pas kosovarëve, duke përfaqësuar 11 për qind të totalit të hyrjeve për periudhën janar–qershor.
Megjithatë, për ekspertët e sektorit, këto të dhëna përbëjnë një kambanë alarmi për modelin e zhvillimit turistik, i cili po përballet me mungesë standardizimi, rritje të paqëndrueshme të çmimeve dhe mbingarkesë në infrastrukturë.
Nëse kjo prirje vijon edhe gjatë korrikut dhe gushtit, Shqipëria rrezikon të humbasë një nga tregjet më të rëndësishme europiane për turizmin e saj.
