Ministria e Mbrojtjes dhe Agjencia Kombëtare e Mbrojtjes Civile kanë përditësuar situatën e zjarreve në vend, duke njoftuar se gjatë 24 orëve të fundit janë evidentuar 16 vatra zjarri në të gjithë territorin, nga të cilat 4 mbeten ende aktive.
Vatrat janë përhapur në bashkitë Vlorë, Finiq, Vau i Dejës, Poliçan, Dimal, Skrapar, Bulqizë, Dibër, Kavajë, Tiranë, Korçë, Librazhd, Fier, Kurbin dhe Kukës.
Situata më e rënduar paraqitet në bashkinë Vlorë, në zonën e Orikumit, në vendin e quajtur “Sotiran” mes fshatrave Tragjas dhe Dukat.
Zjarri ka përfshirë një sipërfaqe të madhe me shkurre e ferra në lartësi malore. Në terren janë angazhuar 7 zjarrfikës, 4 punonjës të shërbimit pyjor, 7 forca bashkiake, 40 forca të ushtrisë dhe është vënë në përdorim edhe helikopteri Cougar për ndërhyrje nga ajri.
Në Poliçan, fshati Zgërbonjë, zjarri është përhapur me shpejtësi për shkak të temperaturave të larta dhe erës. Rreziku për banesat është shmangur. Aktualisht, janë në operacion 7 efektivë me 2 automjete zjarrfikëse dhe 5 punonjës të shërbimit pyjor.
Në Bulqizë, njësia Zerqan, zjarri ka përfshirë një sipërfaqe pyjore me pisha dhe dëllinja. Edhe pse intensiteti ka rënë, në zonë mbeten 3 vatra të ndara aktive.
Në terren ndodhen 2 automjete zjarrfikëse me 11 efektivë, 7 punonjës pyjorëdhe 3 vullnetarë. Sipërfaqja e djegur në këtë zonë vlerësohet në rreth 17 hektarë.
Në Dibër, në zonën e mbrojtur të Parkut Kombëtar të Lurës, pranë “Liqenit të Luleve”, zjarri ka përfshirë pisha dhe livadhe.
Për shkak të erës, flakët janë përhapur me shpejtësi duke rrezikuar pjesë të mëdha të parkut. Aktualisht nuk ka rrezik për banesa, ndërkohë që në vendngjarje janë të pranishëm 5 forca të AdZM, 6 zjarrfikës, 5 forca bashkiake, 15 vullnetarë si dhe helikopteri Cougar.
Në Tiranë, në fshatin Ndroq, një zjarr ka shkrumbuar një banesë 2-katëshe, ndërsa në Fier, në fshatin Mbrostar, një zjarr në një hangar me bazë ushqimore për bagëti ka shkaktuar ngordhjen e rreth 75 deleve dhe dëmtim të lehtë të pronarit. Shkaku i këtyre zjarreve mbetet ende i panjohur.
Në total, nga zjarret e raportuara në 24 orët e fundit janë djegur rreth 24 hektarë sipërfaqe me shkurre, pemë dhe barishte.
Për shuarjen e flakëve janë angazhuar 31 automjete zjarrfikëse dhe 268 forca, përfshirë 60 efektivë të Forcave të Armatosura dhe 2 automjete zjarrfikëse ushtarake.
Sipas Institutit të Gjeoshkencave, rreziku nga zjarret mbetet i lartë në shumicën e qarqeve, përveç Shkodrës ku parashikohet një rrezik i ulët dhe Kukësit, ku rreziku vlerësohet i moderuar.
Në qarqet e tjera rreziku është i lartë, megjithëse në disa zona të veriut priten reshje të dobëta.
Ministria e Mbrojtjes i bën thirrje qytetarëve të shmangin çdo veprim që mund të shkaktojë zjarr në natyrë, të denoncojnë menjëherë çdo vatër dhe të bashkëpunojnë me autoritetet për të mbrojtur jetën, pronën dhe mjedisin.
Strukturat e Mbrojtjes Civile vijojnë të mbeten në gadishmëri të plotë për ndërhyrje të menjëhershme në çdo rast emergjence. /skyweb.al
